კომპანია "კარდემმა", რომელიც „ზარას" ერთ-ერთი უმსხვილესი მიმწოდებელია საქართველოში, შესაძლოა, საწარმო გახსნას. როგორც სააგენტო "ჯი-ეიჩ-ენთან" საუბრისას ეროვნული საინვესტიციო სააგენტოს დირექტორმა ქეთი ბოჭორიშვილმა განაცხადა,"კარდემთან" ინტენსიური მოლაპარაკებები მიმდინარეობს და ის საქართველოსთან თანამშრომლობის ორ მიმართებას განიხილავს.
ბოჭორიშვილის განმარტებით, „კარდემი" საქართველოში ან საკუთარ საწარმოს გახსნის, ან რომელიმე ქართულ საწარმოსთან ითანამშრომლებს.
"კარდემს" პროდუქციას უკვეთავს "ზარა". "ზარა" როგორც ცნობილია, თავად არ კერავს და ყავს რამდენიმე მიმწოდებელი და ერთ-ერთია „კარდემი", რომელიც "ზარას" უმსხვილეს მიმწოდებლად ითვლება", - განაცხადა "ჯი-ეიჩ-ენთან" საუბარში ქეთი ბოჭორიშვილმა.
როგორც ეროვნული საინვესტიციო სააგენტოს დირექტორი განმარტავს, სააგენტო აქტიურად თანამშრომლობს, როგორც თურქულ ასევე გერმანელ მწარმოებლებთან.
"ჩვენი მუშაობა ორი მიმართულებით წარმოებს. ერთია ის, რომ არსებულ კომპანიებს საერთაშორისო დაკვეთები გაეზარდოთ და გაიზარდოს მათი წარმოება. ასევე მეორე მიმართულებაა - საქართველოში ახალი კომპანიები შემოვიდნენ, რადგანაც ამ მიმართულებით საკმაოდ კონკურენტუნარიანი გარემოა. ამ ეტაპზე, რამდენიმე კომპანიასთან ვაწარმოებთ მოლაპარაკებას",- განაცხადა ქეთი ბოჭორიშვილმა.
