„გამომცემლობა სამშობლოს" კრედიტორს საშუალება ეძლევა შპს „გამომცემლობა სამშობლოს" ქონება ერთანი კომპლექსის სახით შეიძინოს. როგორც გაკოტრების მმართველის, აღსრულების ეროვნული ბიუროს წარმომადგენლის ვ. ხაჭაპურიძის განცხადებაშია აღნიშნული „სამშობლოს" კრედიტორს, ჩავარდნილი აუქციონის შემდეგ, საშუალება ეძლევა „გამომცემლობა სამშობლოს" ქონება ერთანი კომპლექსის სახით შეიძინოს.
გაკოტრების მმართველის განცხადებაში აღნიშნულია, რომ 31 იანვრიდან 9 თებერვლამდე მიმდინარეობდა პირველი აუქციონი, სადაც გამოტანილი იყო შპს „გამომცემლობა სამშობლოს" ქონება ერთანი კომპლექსის სახით. აუქციონი დასრულდა უშედეგოდ.
შესაბამისად, „გადახდისუუნარობის საქმის წარმოების შესახებ" კანონის მიხედვით, თუ პირველ აუქციონზე არ მოხდა ქონების რეალიზაცია და ქონების საწყისი ფასი კრედიტორთა მოთხოვნებზე ნაკლებია, ნებისმიერ კრედიტორს, რომლის მოთხოვნასაც ფარავს, მაგრამ არ აღემატება პირველ აუქციონზე სარეალიზაციოდ გატანილი ქონების საწყისი ფასი, უფლება აქვს, პირველი აუქციონის დასრულებიდან 20 დღის ვადაში მიმართოს გაკოტრების მმართველს ქონების საკუთრებაში გადაცემის მოთხოვნით.
„ასეთ შემთხვევაში კრედიტორი ვალდებულია დაფაროს წინა და იმავე რიგების კრედიტორთა მოთხოვნები და მიმართვას დაურთოს აღსრულების ეროვნული ბიუროს სადეპოზიტო ანგარიშზე წინა და იმავე რიგების კრედიტორთა მოთხოვნების დაფარვის მიზნით თანხის შეტანის დამადასტურებელი დოკუმენტი. ერთზე მეტი მიმართვის არსებობისას ქონების საკუთრებაში მიღების უფლება წარმოეშობა იმ კრედიტორს, რომლის მიმართვაც, ამ პუნქტით განსაზღვრული დოკუმენტაციით, უფრო ადრეა რეგისტრირებული"- აღნიშნულია გაკოტრების მმართველის განცხადებაში.
