16 თებერვალს საქართველო საქართველო-თურქეთ-აზერბაიჯანის ბიზნესფორუმს მასპინძლობს. ფორუმი 16 თებერვალს, 10:00 საათზე, სასტუმრო "რადისონ ბლუ ივერიაში" გაიმართება. ორგანიზატორები არიან ეკონომიკისა და მდგრადი განვითარების სამინისტრო, ეროვნული საინვესტიციო სააგენტო, სავაჭრო-სამრეწველო პალატა, დამსაქმებელთა ასოციაცია, თურქეთის სავაჭრო პალატების გაერთიანება და აზერბაიჯანის ექსპორტისა და ინვესტიციების ხელშეწყობის ფონდი.
ბიზნესფორუმზე ქართულ კომპანიებს შესაძლებლობა ექნებათ, შეხვდნენ და მოლაპარაკებები გამართონ პოტენციურ ბიზნესპარტნიორებთან შესაბამისი სექტორების მიხედვით.
ფორუმში მონაწილეობის მისაღებად საქართველოს თურქეთის რესპუბლიკის ეკონომიკის მინისტრი ზაფერ ჩაღლაიანი, აზერბაიჯანის რესპუბლიკის ეკონომიკური განვითარების მინისტრი შაჰინ მუსტაფაევი და მთავრობის სხვა წარმომადგენელი ეწვევიან.
ბიზნესფორუმს საქართველოს ეკონომიკისა და მდგრადი განვითარების მინისტრი ვერა ქობალია გახსნის.
როგორც სააგენტო "ჯი-ეიჩ-ენს" დამსაქმებელთა ასოციაციიდან აცნობეს, აზერბაიჯანულ და თურქულ დელეგაციაში მთავრობის წევრებთან ერთად იქნებაინ ბიზნესმენებიც.
დელეგაციაში შემავალი ბიზნესმენები წარმოადგენენ კომპანიებს სოფლის მეურნეობის, სამშენებლო, მსუბუქი მრეწველობის, საფინანსო სექტორებიდან. მათი მიზანია საქართველოში ბიზნესპარტნიორების მოძიება და საქმიანი ურთიერთანამშრომლობის დამყარება.