ფინანსთა სამინისტროს აკადემიას ახალი სასწავლო კომპლექსი აქვს, რომელიც დღეს გაიხსნა. კომპლექსი საერთაშორისო დონორი ორგანიზაციების მხარდაჭერით გაკეთდა და ის 160 მსმენელზეა გათვლილი.
ფინანსთა სამინისტროს აკადემიის ახალი სასწავლო კომპლექსი - ეს არის საერთაშორისო სტანდარტების შესაბამისი, თანამედროვე ტექნიკით აღჭურვილი სასწავლო ბაზა, რომელსაც არ აქვს ანალოგი საქართველოში. კომპლექსი აერთიანებს სასწავლო აუდიტორიებს, საკონფერენციო დარბაზს, ენებისა და კომპიუტერულ ცენტრებს, სადაც მსმენელებს კომფორტული ტრეინინგ გარემო და მაღალკვალიფიციური ტრეინერები დახვდებათ.
2012 წელს აკადემიის ახალ კომპლექსში უკვე დაგეგმილია სასწავლო პროგრამები. მნიშვნელოვანია, რომ ფინანსთა სამინისტროს აკადემია აქტიურად თანამშრომლობს სხვადასხვა საერთაშორისო ორგანიზაციებთან ერთობლივი სასწავლო კურსების ორგანიზების მიზნით. ამჟამად, ფინანსთა სამინისტრო ინტენსიურად მუშაობს საერთაშორისო სავალუტო ფონდთან და წელს საქართველოში, მაისში, პირველად ჩატარდება სსფ-ის ინსტიტუტის სასწავლო კურსი ფინანსური პროგრამირებისა და პოლიტიკის კუთხით.
სასწავლო ცენტრი ფინანსთა მინისტრმა დიმიტრი გვინდაძემ და ფინანსთა სამინისტროს აკადემიის დირექტორმა სერგო ნოზაძემ გახსნეს. ცერემონიალს საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებიც დაესწრნენ.
„ეს რეგიონისთვისაც ერთ-ერთი ფლაგმანური კურსია, რომელიც ფინანსთა სამინისტროს აკადემიის სასწავლო კომპლექსში ჩატარდება. აკადემიის ბაზაზე წელს კიდევ რამდენიმე საერთაშორისო სასწავლო კურსია დაგეგმილი. ზოგადად, ამ ახალი სივრცის დანერგვით იცვლება ინტერაქცია თანამშრომლებსა და სამინისტროს შორის. ფინანსთა სამინისტრო აკეთებს ყველაფერს იმისთვის, რომ მუდმივ რეჟიმში მოხდეს არა მხოლოდ სამინისტროს, არამედ სხვა სახელმწიფო და კერძო სტრუქტურების კადრების გადამზადება,"- განაცხადა ფინანსთა მინისტრმა დიმინტრი გვინდაძემ.
„აკადემია იძლევა შესაძლებლობას, ყველა დაინტერესებულ პირს მაქსიმალურად კომფორტული გარემო შეექმნას პროფესიული უნარ-ჩვევების, ცოდნის მისაღებად და კვალიფიკაციის ასამაღლებლად. საქართველოში აკრედიტებული დიპლომატიური კორპუსის წარმომადგენლებმა კომპლექსს უკვე მიანიჭეს მომავლის აკადემიის სტატუსი,"- განაცხადა ფინანსთა სამინისტროს აკადემიის დირექტორმა სერგო ნოზაძემ.
სასწავლო ცენტრს აქვს ყველა რესურსი იმისთვის, რათა განახორციელოს არა მხოლოდ ფინანსთა სამინისტროს სისტემის თანამშრომელთა პროფესიული მომზადება, არამედ იზრუნოს იმ სახელმწიფო თუ კერძო ორგანიზაციების თანამშრომელთა კვალიფიკაციის ამაღლებაზე, რომლებიც ჩართული არიან ქვეყნის ფულად-საკრედიტო და ზოგადად, ეკონომიკური პოლიტიკის წარმართვაში.
თეორიულ საკითხებთან ერთად აკადემია ორიენტირებულია პრაქტიკულ სწავლებაზე. ფინანსთა სამინისტროს აკადემიის პრიორიტეტული მიმართულებებია: საჯარო ფინანსები და მაკრო-ფისკალური პოლიტიკა, საბიუჯეტო პოლიტიკა და ადმინისტრირება, საგადასახადო პოლიტიკა და ადმინისტრირება, ბუღალტერია, მენეჯმენტი და პროფესიული უნარების განვითარება.
ამჟამად, აკადემიაში მიმდინარეობს ფინანსთა სამინისტროს სისტემის შიდა ტრენინგები, რომელსაც ეტაპობრივად 324 თანამშრომელი გაივლის. საბუღალტრო აღრიცხვის საერთაშორისო სტანდარტების (IPSAS) და ელექტრონული ხაზინის განახლებული პროგრამის (E-Treasury) დანერგვის მიზნით, მიმდინარე წელს სასწავლო ცენტრში საბიუჯეტო ორგანიზაციების 7000-ზე მეტი თანამშრომელი გადამზადდება. აკადემია ასევე აქტიურ თანამშრომლობას გააგრძელებს კერძო სექტორის წარმომადგენლებთან და დაინტერესებულ პირებს ყველაზე მოთხოვნად სასწავლო პროგრამებს შესთავაზებს, რათა მათ ხელი შეუწყოს შრომით ბაზარზე დამკვიდრებაში.
შეგახსენებთ, რომ ფინანსთა სამინისტროს აკადემია სახელმწიფო-საგანმანათლებლო დაწესებულებაა, რომელიც მიზნად ისახავს ფინანსთა სამინისტროს სისტემის თანამშრომელთა პროფესიული ზრდისა და განვითარების, ახალი კვალიფიციური კადრებით დაკომპლექტების ხელშეწყობას; მაღალი სტანდარტების ტრეინინგ-პროგრამების ორგანიზებას ქართველ და საერთაშორისო დონის ტრეინერებთან თანამშრომლობით. აკადემია აქტიურად თანამშრომლობს, როგორც სხვა სახელმწიფო დაწესებულებებთან, ასევე კერძო სექტორთან, საერთაშორისო ორგანიზაციებთან და უმაღლეს სასწავლო დაწესებულებებთან.