მთავრობას „საგადასახადო კოდექსში" მორიგი ცვლილებები შეაქვს, რომელიც სასტუმრო ტიპის სახლის მშენებლობისას, დეველოპერისა და კლიენტის ურთიერთობებს აწესრიგებს.
ცვლილების მიხედვით, სასტუმრო ტიპის სახლში ფართის შეძენისას და მისი დეველოპერთან შეთანხმებით გამოყენებისას, კლიენტს, ანუ ფართის მფლობელს დღგ უკან უბრუნდება.
„ცვლილება ეხება ზოგადად სამშენებლო კომპანიებს. თუ მაგალითად, სამშენებლო კომპანია გადაწყვეტს, რომ აშენებს სასტუმრო ტიპის სახლს, ან სასტუმროს, ფიზიკურ პირებს შეუძლიათ ამ შენობაში ნომრები შეიძინონ. ფიზკურ პირებს ექნებათ საშუალება, რომ წლის განმავლობაში გარკვეული პერიოდით თავად იცხოვრონ ამ ფართში. შემდგომ კი ეს ფართი ისევ უკან მიაქირაონ ამ სამშენებლო კომპანიას, რომელიც იქ წარმართავს ბიზნეს და თავად დეველოპერი გააქირავებს ამ ნომრებს. იჯარის ქირას კი ფიზიკურ პირს გადაუხდის. კოდექსში შესატანი ცვლილების მიზანი კი არის ის, რომ ასეთი მოლაპარაკების შემთხვევაში, თუ სამშენებლო კომპანია ამას ბიზნესად აქცევს, ფიზიკურ პირს გადახდილი დღგ უკან დაუბრუნდება", - განაცხადა სააგენტო „ჯი-ეიჩ-ენთან" საუბრისას შემოსავლების სამსახურის უფროსმა ჯაბა ებანოიძემ.