საქართველოს სტატისტიკის ეროვნული სამსახურისა და შვედეთის სტატისტიკის ერთობლივი პროექტის ფარგლებში „საქსტატში" ერთკვირიანი სამუშაო ვიზიტით შვედი სტატისტიკოსები ჩამოვლენ.
შვედეთის სტატისტიკის სამსახურის თანამშრომლები ქართველ კოლეგებს მენეჯმენტის საკითხებზე ტრენინგს ჩაუტარებენ.
მისიის ფარგლებში შეხვედრები მოეწყობა „საქსტატის" ხელმძღვანელობასთან. ასევე შედგება შეხვედრები საშუალო რგოლის ხელმძღვანელებთან და მათთვის ჩატარდება გაცნობითი სემინარი სტატისტიკის შესახებ. მისიის ფარგლებში ასევე გაიმართება შეხვედრები სხვადასხვა უწყების თანამშრომლებთან, რომელთაც მჭიდრო საქმიანი ურთიერთობა „საქსტატთან" აქვთ.
„საქსტატსა" და შვედეთის სტატისტიკას შორის 3-წლიანი თანამშრომლობის პროექტის ფარგლებში შვედეთის სტატისტიკა „საქსტატს" ტექნიკურ დახმარებას უწევს ინფლაციის, მთლიანი შიდა პროდუქტის, თანამშრომელთა ტრენინგის, და სხვა ძირითადი სტატისტიკური კომპონენტების ხარისხის გაუმჯობესების მიმართულებით. პროექტის ბიუჯეტი 4 მილიონი ლარის ექვივალენტს შეადგენს შვედურ კრონებში და მთლიანად დაფინანსებულია შვედეთის საერთაშორისო განვითარების სააგენტოს (SIDA) მიერ.