2012 წელს ქართული ღვინო მინიმუმ 5 საერთაშორისო გამოფენაზე იქნება წარდგენილი. როგორც სააგენტო „ჯი-ეიჩ-ენს" „სამტრესტში" განუცხადეს, 2012 წელს დაგეგმილია მონაწილეობა შემდეგ საერთაშორისო გამოფენებში: „Prowein" (Dusseldorf), „Wine and Spirits fair" (London), "Hong Kong International Wine&Spirits Fair", "Shangai Wine&Spirits International Expo" და "Gourmet Food&Wine Expo" (Toronto).
როგორც ცნობილია 2011 წელს ქართული ღვინო წარდგენილი იყო ექვს საერთაშორისო გამოფენაში, სადაც ქართულმა ღვინომ დიდი მოწონება დაიმსახურა. ქართული ღვინის პოპულარიზაციას საქართველოს მთავრობა Prowein-ზე (დუსელდორფში), London Fair-ზე (ლონდონში) Niagara Food&Wine Expo-ზე (კანადაში), China-Eurasia Expo-ზე (ჩინეთში), WinExpo Ukraine-ზე (უკრაინაში) და Gourmet Food&Wine Expo-ზე (კანადაში) შეეცადა.
2011 წელი საქართული ღვინისათვის საკმაოდ წარმატებული იყო, რადგანაც ჰონგ-კონგის ღვინისა და სპირტიანი სასმელების საერთაშორისო კონკურსზე ქართულმა ალკოჰოლურმა სასმელმა გრან-პრი, 2 ოქროს, 1 ვერცხლის და 13 ბრინჯაოს მედალი მიიღო. გრან-პრი და ოქროს მედალი "ქინძმარაულის მარანის" მუხაში დაძველებულმა საფერავმა მიიღო. ასევე ოქროს მედლით დაჯილდოვდა ‘შატო მუხრანის" ჭაჭა.
აღსანიშნავია, რომ „ქვეყნის ძირითადი მონაცემები და მიმართულებები 2012-2015 წლებისათვის" დოკუმენტშია აღნიშნული საქართველოს სოფლის მეურნეობის სტრატეგიის ამოცანა მეღვინეობის სფეროში ექსპორტის ზრდა და ბაზრების დივერსიფიკაციაა, საშუალოვადიან პერიოდში, ღვინის ტურიზმის განვითარებისა და ღვინის შიდა მოხმარების გაზრდის მიზნით დაგეგმილია ასევე ქვევრის ღვინის ბრენდის შექმნა და პოპულარიზაცია.
დოკუმენტში ასევე აღნიშნულია, რომ 2015 წლისათვის ღვინის ექსპორტის ღირებულება უნდა გაორმაგდეს, ხოლო წარმოება 50%-ით გაიზარდოს;
იმავდროულად მოეწყობა ასევე ქართული ღვინოპროდუქციის საერთაშორისო და ადგილობრივი დეგუსტაცია-კონკურსებისა და გამოფენების გზით. დაგეგმილია ასევე ქართული ღვინის სადეგუსტაციო ცენტრის მოწყობა.
