საქართველო ტურისტული პოტენციალის რეკლამირებას პოლონეთის ბაზარზე იწყებს. ტურიზმის ეროვნული ადმინისტრაციის ინფორმაციით, ადმინისტრაცია პოლონეთის ბაზარზე საქართველოს კომპლექსურ სარეკლამო კამპანიას ახორციელებს, რაც მოიცავს სატელევიზო, გარე (ბანერები, ბილბორდები), ინტერნეტ და ბეჭდვით მედიაში რეკლამებს.
კამპანიის ფარგლებში 2012 წლის 12-15 თებერვალს საქართველოს ესტუმრებიან პოლონელი ჟურნალისტების 12-კაციანი ჯგუფი, რომელშიც შედის ტელევიზია “Breakfast TV”-ის გადამღები ჯგუფი, ხოლო დანარჩენი ბეჭვით მედიას წარმოადგენს. იმავდროულად, ამასთანავე ჯგუფის შემადგენლობაში არის ცნობილი პოლონელი მომღერალი და სელებრითი ნატალია ლეცი, რომელმაც სულ ცოტა ხნის წინ ჩაწერა სიმღერა ბათუმზე და გადაიღო კლიპი. სწორედ ნატალია ლეცი გაუძღვება თავის კოლეგებს და მონაწილეობას მიიღებს “Breakfast TV”-ის გადაცემების ჩაწერაში.
ტურის მთავარი თემებია: ქართული ღვინო და სამზარეულო, კულტურა და სამთო-სათხილამურო ტურიზმი.
პრეს-ტურის შედეგად მომზადდება სტატიები საქართველოზე, ხოლო “Breakfast TV” მოამზადებს 4 სიუჟეტს ზემოთ ჩამოთვლილ თემებთან დაკავშირებით.
12 თებერლავს ჟურნალისტები შეხვდებიან და ინტერვიუებს მოამზადებენ ეკონომიკისა და მდგრადი განვითარების მინისტრ ვერა ქობალიასთან (15 საათზე), ტურიზმის ადმინისტრაციის ხელმძღვანელ მაია სიდამონიძესთან (14 საათზე) და სოფლის მეურნეობის მინისტრ ზაზა გოროზიასთან (16 საათზე). საუბრის თემა ზოგადად საქართველოს, მისი კულტურისა და ტრადიციების შესახებ იქნება.
ქართველ ჟურნალისტებს პოლონელ კოლეგებთან შეხვედრა და ინფორმაციის გაცვლა, 12 თებერვალს, ეკონომიკისა და მდგრადი განვითარების სამინისტროში 14:30 საათზე შეეძლებათ.
მასალის გამოყენების პირობები