აჭარაში ტურისტების რაოდენობა 18,6%-ით გაიზარდა. როგორც სააგენტო „ჯი-ეიჩ-ენს" აჭარის ტურიზმის დეპარტამენტში განუცხადეს, 2012 წლის იანვარში აჭარა 53 ათას 54 ვიზიტორმა მოინახულა, რაც წინა წლის იანვართან შედარებით 18,6%-ით მეტია, ხოლო 2010-თან შედარებით კი 78,5%-ით მეტი.
2011 წლის იანვარში სულ აჭარაში 44 ათას 727 ვიზიტორი ჩავიდა, ხოლო 2010 წლის იანვარში კი 29 ათას 720 ვიზიტორი.
აჭარის ტურიზმის დეპარტამენტის ინფორმაციით, 2012 წლის იანვარში აჭარაში ჩამოსულ უცხოელ ვიზიტორთა რაოდენობამ 18 ათას 830 ვიზიტორი შეადგინა, რაც 2011 წლის იმავე პერიოდთან შედარებით 72%-ით მეტია. 2011 წლის იანვარში აჭარას 10 ათას 945 უცხოელი ვიზიტორი სტუმრობდა, ხოლო 2010 წელს კი 7 ათას 877 ვიზიტორი.
უცხოელი ტურისტებიდან ლიდერობას ისევ თურქი ვიზიტორები ინარჩუნებენ. სტატისტიკური ინფორმაციის მიხედვით, 2012 წლის იანვარში აჭარა 10 ათას 569 თურქმა ვიზიტორმა მოინახულა. ვიზიტორთა რაოდენობის მიმართულებით მეორე ადგილზე ირანია, საიდანაც აჭარაში 2 ათას 820 ვიზიტორი შემოვიდა.