სავაჭრო-სამრეწველო პალატა ევროკავშირში ეკონომიკური ინტეგრაციის ფორუმს ქმნის. პალატის ინფორმაციით, 2011 წლის 5 დეკემბერს ევროკავშირმა მიიღო გადაწყვეტილება ღრმა და ყოვლისმომცველი თავისუფალი ვაჭრობის შესახებ შეთანხმებაზე საქართველოსთან მოლაპარაკებების დაწყების თაობაზე.
საქართველოს სავაჭრო-სამრეწველო პალატაში მიღებული გადაწყვეტილების საფუძველზე, „ევროკავშირში ეკონომიკური ინტეგრაციის ფორუმი“ შეიქმნება, რომლის მიზანია, ერთის მხრივ, ქართველი მეწარმეების ინფორმირება თავისუფალი ვაჭრობის შესახებ შეთანხმებაზე მოლაპარაკების პროცესის თაობაზე, და მეორეს მხრივ, ამ პროცესში მათი ინტერესების მაქსიმალური გათვალისწინება.
„ევროპასთან თავისუფალი ვაჭრობის შესახებ შეთანხმება, ქართველ მეწარმეებს შესაძლებლობას მისცემს ევროპულ ბაზარზე საკუთარი პროდუქცია დამატებითი ბარიერების გარეშე გაიტანონ და ადგილი დაიმკვიდრონ ახალ ბაზარზე. „ევროკავშირში ეკონომიკური ინტეგრაციის ფორუმი“ აქტიურად ჩაერთვება ამ პროცესში, გაიმართება დისკუსიები ბიზნესმენებთან, მოხდება ჩვენი კომპანიების ინტერესების განსაზღვრა და გაზიარება მოლაპარაკებებში მონაწილე მხარეებისათვის.“ - განაცხადა სავაჭრო სამრეწველო პალატის პრეზიდენტმა კახა ბაინდურაშვილმა.
მასალის გამოყენების პირობები