"კონსტიტუციის 42-ე მუხლი" მიიჩნევს, რომ საქართველოს მთავრობის ჩართულობა სამართალწარმოების პროცესში არსებით გავლენას მოახდენს საქმეთა შედეგზე, საქართველოს მხარეს მიეცემა შესაძლებლობა წარადგინოს დამატებითი არგუმენტაცია და სხვა მტკიცებულებები, რომელიც ხელს შეუწყობს დაზარალებულთა უფლებების დაცვას ევროპის სასამართლოში.

"კონსტიტუციის 42-ე მუხლმა" ევროსასამართლოდან სულ 282 დაზარალებულის საქმეზე მიიღო შეტყობინება, ეს სწორედ ის ადამიანები არიან, რომლებიც მიიჩნევენ, რომ რუსეთის მხრიდან განსაკუთრებული სისასტიკის მსხვერპლნი გახდნენ. ყოველივე ამის გამო, ევროსასამართლოში გაგზავნილ საქმეთა უმეტესობაში დაზარალებულები ასაჩივრებენ რუსეთის ფედერაციის მხრიდან ადამიანის უფლებათა ევროპული კონვენციის რამდენიმე მუხლის დარღვევას.

• სიცოცხლის უფლება (ევროკონვენციის მე-2 მუხლი)
• წამება და არაადამიანური მოპყრობა (მე-3 მუხლი)
• მონობა და იძულებითი შრომა (მე-4 მუხლი)
• თავისუფლებისა და ხელშეუხებლობის უფლება/თავისუფლების უკანონო აღკვეთა (მე-5 მუხლი)
• პირადი და ოჯახური ცხოვრების პატივისცემის უფლება (მე-8 მუხლი)
• სამართლიანი დაცვის ეფექტიანი საშუალების უფლება (მე-13 მუხლი)
• დისკრიმინაციის აკრძალვა (მე-14 მუხლი)
• საკუთრების უფლება (1 დამატებითი ოქმის 1 მუხლი)

დაზარალებულები ითხოვენ, ევროსასამართლომ რუსეთის მხრიდან დარღვეულად სცნოს ევროკონვენციის ზემოთხსენებული მუხლები და დააკისროს რუსეთის ფედერაციას, აუნაზღაუროს მათ მიყენებული მატერიალური ზარალი და მორალური ზიანი.

"კონსტიტუციის 42-ე მუხლი" იმედოვნებს, რომ თუ ევროსასამართლო დადებით გადაწყვეტილებას მიიღებს საქართველოს მხარის მესამე პირად ჩართვის შესახებ, ეს გავლენას მოახდენს საქართველოს მოქალაქეების მიერ რუსეთის წინააღმდეგ წარდგენილი მსგავსი საჩივრების დადებით გადაწყვეტაზე.