"ანგარიშის მიხედვით, 26 მაისს, თბილისში ხელისუფლებამ გამოიყენა გაუმართლებელი ძალა მშვიდობიანი დემონსტრაციის დარბევისას, ხოლო მასობრივი დაპატიმრებების შემდეგ დაკავებულთა უფლებები არ იქნა დაცული სასამართლოს მიერ. ასევე ანგარიშში აღნიშნულია, რომ ხელისუფლებამ დღემდე არ უზრუნველყო მაისის მოვლენების გამოძიება. სადამსჯელო სპეცოპერაციის დროს მშვიდობიანი აქციის მონაწილეთა დააკავება, ფიზიკური და მორალური შეურაცყოფა, ორგანიზაციის მიერ შეფასდა როგორც პოლიციური სისასტიკე.
Human Rights Watch-ი საქართველოში ადამიანის უფლებათა დაცვის კუთხით არსებულ მდგომარეობას კატასტროფულს უწოდებს და აღნიშნავს, რომ ამ ასპექტში ევროკავშირმა და შეერთებულმა შტატებმა, ვერ მოახერხეს ზეგავლენის მოხდენა საქართველოს ხელისუფლებაზე. ანგარიშში ასევე აღნიშნულია, რომ „მაისის მოვლენების დროს, ქართველ და უცხოელ ჟურნალისტებს ხელი შეეშალათ პროფესიული საქმიანობის განხორციელაბაში. რამდენიმე მათგანს კი ფიზიკური ზიანიც მიადგა", - განაცხადა ყოლბაიამ.
მისი თქმით, Human Rights Watch-ი ასევე აქვეყნებს ფაქტს, რომ დაპატიმრების შემდეგ პოლიციამ ფიზიკური და ფსიქოლოგიური ზეწოლით, აქციის მონაწილეები აიძულა ხელი მოეწერათ პირობაზე, რომ აღარ მიიღებენ მონაწილეობას საპროტესტო აქციებში.

"ამ ავტორიტეტული საერთაშოისო უფლებადაცვითი ორგანიზაციის მიერ წარმოდგენილი ანგარიშით, კიდევ ერთხელ დადასტურდა ის, რაც „დემოკრატიულ მოძრაობას" და „სახალხო კრებას" არაერთხელ განუცხადებია და რაზეც მანამდე ათობით უცხოური და ქართული უფლებადაცვითი ორგანიზაციები საუბრობდნენ..
მიუხედავად „სახალხო კრების" და „დემოკრატიული მოძრაობის" არაერთგზის მოთხოვნისა ხელისუფლება არ ატარებს 26 მაისის მოვლენებზე ობიექტურ გამოძიებას, საქართველოს პარლამენტში კი, ოპოზიციის რამოდენიმე დეპუტატის მიერ ინიცირებული წინადადება, 26 მაისის მოვლენების შემსწავლელი კომისიის შექმნის შესახებ, ხელისუფლების პირდაპირი მითითებით, ნაციონალურმა უმრავლესობამ დაბლოკა. როგორ შეიძლება საქართველოში გატარებული პოლიციისა და სასამართლო რეფორმა შეფასდეს დადებითად იმის ფონზე, როცა Human Rights Watch-ის ანგარიშშიც კი იმაზეა საუბარი, რომ ადამიანთა დაპატიმრებისას სასამართლოები ეყრდნობოდნენ მხოლოდ პოლიციის მიერ წარმოდგენილ ჩვენებებს და არ ითვალისწინებდნენ დაცვის მხარის არგუმენტებსა და მოტივებს", - განაცხადა ყოლბაიამ.

მისი ინფორმაციით, სწორედ სასამართლოს მიერ გამოტანილი უსამართლო განაჩენების გამო, დღემდე საპატიმროებში უკანონოდ სასჯელს იხდის მაისის მოვლენებისას დაპატიმრებული 41 ადამიანი.

"„დემოკრატიული მოძრაობა" კიდევ ერთხელ აცხადებს, რომ საქართველოს დღევანდელი ხელისუფლება არფრად აგდებს, არა თუ უცხოური საერთაშორისო ორგანიზაციების, არამედ ჩვენი მეგობარი სახელმწიფოების უმაღლესი პირების რეკომენდაციებსაც კი, თუ ეს რეკომენდაციები არ შედის სააკაშვილისა და მისი გუნდის ინტერესთა სფეროში, ვინაიდან მათთვის პრიორიტეტული მხოლოდ საკუთარი ძალაუფლების შენარჩუნებაა და არა ქვეყნის რეალური დემოკრატიული განვითარება", - აღნიშნა პარტიის გენერალურმა მდივანმა.