ეკონომიკისა და მდგრადი განვითარების სამინისტროში მორიგი საკადრო ცვლილებები განხორციელდა - მინისტრის მოადგილეებად ნათია მიქელაძე და მიხეილ ჯანელიძე დაინიშნენ.
სამინისტროს ინფორმაციით, ნათია მიქელაძე ბოლო პერიოდში საქართველოს ენერგეტიკისა და ფინანსთა მინისტრების მოადგილის თანამდებობებზე მუშაობდა. რაც შეეხება მიხეილ ჯანელიძეს, იგი ეკონომიკისა და მდგრადი განვითარების სამინისტროში საგარეო ვაჭრობისა და საერთაშორისო ეკონომიკური ურთიერთობების დეპარტამენტს ხელმძღვანელობდა.
ეკონომიკისა და მდგრადი განვითარების მინისტრს ასევე ახალი პირველი მოადგილე ჰყავს - ეს თანამდებობა ირაკლი მატკავამ დაიკავა, რომელიც ბოლო პერიოდამდე მინისტრის მოადგილე იყო, ხოლო მანამდე ეროვნულ საინვესტიციო სააგენტოს ხელმძღვანელობდა. ირაკლი მატკავამ მინისტრის პირველი მოადგილის თანამდებობაზე არჩილ კეკელია შეცვალა, რომელიც ისრაელში საქართველოს საგანგებო და სრულუფლებიან ელჩად დაინიშნა.