საქართველოს ეროვნული არქივი, "M.T. - Studio-სა" და „კიკალა სტუდიოსთან" ერთად, ჩართულია პროექტში „ძველი და ახალი", რომლის მიზანია საქართველოს წარსულისა და აწმყოს ასახვა.
როგორც „ჯი-ეიჩ-ენს" ეროვნული არქივიდან აცნობეს, პროექტი ითვალისწინებს მაღალმხატვრული ალბომის შექმნას, რაც საშუალებას მოგვცემს, შევადაროთ საუკუნისწინანდელი რეალობა აწმყოსთან.
პროექტის მიზნებიდან გამომდინარე, ეროვნულმა არქივმა მოიძია ძველი საწარმოების, ამა თუ იმ შინაარსის დაწესებულებისა და მათი მუშაკების, მედიკოსების, ხელოვნების დარგში მოღვაწე ადამიანების, ასევე, ეთნოგრაფიული ხასიათის სურათები, რომლის თანამედროვე ანალოგს „კიკალა სტუდიო" იღებს.
შერჩეულ მასალაშია უნიკალური კადრები, რომელიც მე-19-მე-20 საუკუნეებში სხვადასხვა ფოტოგრაფმა გადაიღო.
პროექტის ფარგლებში მომზადებული გამოცემა 2012 წლის გაზაფხულზე დაიბეჭდება.
