საჯარო რეესტრის ეროვნული სააგენტოს თავმჯდომარემ სოსო წიქარიშვილმა ავღანეთის ვაჭრობისა და მრეწველობის სამინისტროს წარმომადგენლებს უმასპინძლა.
როგორც „ჯი-ეიჩ-ენს"საჯარო რეესტრის ეროვნული სააგენტოდან აცნობეს, ვიზიტის მიზანი ბიზნესისა და უძრავი ქონების რეგისტრაციის სფეროში საქართველოს - როგორც ტოპ რეფორმატორი ქვეყნის გამოცდილების გაზიარებაა.
ვიზიტი, საერთაშორისო საფინანსო კორპორაციის (IFC) ორგანიზებით, ავღანეთის ბიზნესის ლიცენზირების რეფორმის პროექტის ფარგლებში მიმდინარეობს.
სააგენტოს თავმჯდომარემ სტუმრებს უძრავი ქონებისა და ბიზნესის რეგისტრაციის სფეროში განხორციელებული რეფორმები გააცნო. დელეგაციის წევრების განსაკუთრებული ინტერესი გამოიწვია ბიზნესის რეგისტრაციის განმარტივებულმა პროცედურებმა და ელექტრონულმა რეგისტრაციამ.
ვიზიტის ფარგლებში დელეგაცია რუსთავის იუსტიციის სახლსაც ეწვია, სადაც იუსტიციის მინისტრის მოადგილემ გიორგი ვაშაძემ სტუმრებს გააცნო იუტიციის სამინისტროს ახალი ბრენდის - იუსტიციის სახლის კონცეფცია და ამომწურავი ინფორმაცია მიაწოდა იუსტიციის სახლის თვითმომსახურების, სწრაფი და ხანგრძლივი მომსახურების სივრცეების შესახებ.
ვიზიტის ფარგლებში დელეგაციის წევრები მომსახურების სააგენტოსა და თბილისის გაფორმების ეკონომიკურ ზონასაც ესტუმრნენ.
ავღანეთის ვაჭრობისა და ბიზნესის რეგულირების სამინისტრო ამჟამად ბიზნესის ელექტრონული რეგისტრაციისა და ლიცენზირების პროცესის გამარტივების საკითხებზე მუშაობს. იუსტიციის სახლის, საჯარო რეესტრის, მონაცემთა გაცვლის სააგენტოს და პრემიერ-მინისტრის მრჩეველთა ჯგუფთან შეხვედრის ფარგლებში, დელეგაციის წევრები, სახელმწიფო მომსახურების სფეროში ქვეყანაში გატარებული წარმატებული რეფორმების შედეგებს გაეცნენ.
საერთაშორისო საფინანსო კორპორაციისა და მსოფლიო ბანკის კვლევის „ბიზნესის წარმოება 2012"-ის თანახმად, საქართველო წელს მსოფლიოში პირველ ადგილზეა ქონების რეგისტრაციის თვალსაზრისით. კვლევაში ასევე აღნიშნულია, რომ საქართველო 2005-2011 წლებში ყველაზე წარმატებული იყო სამეწარმეო გარემოს ეფექტიანად რეგულირების თვალსაზრისით.
საქართველოში IFC-ის წარმომადგენლის თეა გიგიბერიას განცხადებით, „საქართველოში მნიშვნელოვანი ნაბიჯები გადაიდგა საინვესტიციო გარემოს გაუმჯობესების მიმართულებით და ეს ვიზიტი საშუალებას მისცემს ჩვენს ავღანელ სტუმრებს პირადად გაეცნონ აქ მიმდინარე პროცესებს. საქართველოში რამდენიმე ღონისძიება მოეწყო სხვადასხვა ქვეყნის სახელმწიფო მოხელეებისთვის ბიზნესის რეგულირების რეფორმების სფეროში საქართველოს წარმატების გაზიარების მიზნით."