"ალდაგი ბისიაის" საპენსიო ფონდმა 2011 წლის შედეგები გამოაქვეყნა. "ალდაგი ბისიაის" საპენსიო ფონდის წლიურმა წმინდა საინვესტიციო მოგებამ 2011 წელს 12.7% შეადგინა. საპენსიო სქემის დაარსებიდან 2011 წლის 31 დეკემბრამდე საინვესტიციო მოგების კუმულატიური მაჩვენებელი 96.1%-ით განისაზღვრა, რაც საგძნობლად აჭარბებს ანალოგიურ პერიოდში ქვეყანაში დაფიქსირებული ინფლაციის მაჩვენებელს. კომპანიის ინფორმაციით, 2011 წელს "ალდაგი ბისიაის" საპენსიო ფონდის აქტივების მთლიანი ღირებულება 36.5%-ით გაიზარდა და შეადგინა 6.8 მილიონი ლარი. საპენსიო ფონდის დაარსებიდან აქტივების მთლიანი ღირებულება ყოველწლიურად საშუალოდ 92.9% იზრდებოდა.
როგორც ცნობილი, სს "ალდაგი ბისიაის" საპენსიო ფონდი, უმსხვილესი საპენსიო ფონდი საქართველოში, რომელიც იმართება ერთობლივად შპს "აბბი ასეტ მენეჯმენტისა" და სს "ალდაგი ბისიაის" მიერ.
"სასიხარულოა, რომ "ალდაგი ბისიაის" საპენსიო ფონდმა კიდევ ერთი წელი დაასრულა წარმატებით. მიუხედავად საერთაშორისო ბაზრებზე არსებული არასახარბიელო სიტუაციისა, საპენსიო ფონდმა შეძლო მაღალი საინვესტიციო მოგების და წმინდა შენატანების დაფიქსირება"-, აღნიშნა "ალდაგი ბისიაის" გენერალურმა დირექტორმა ნიკოლოზ გამყრელიძემ.
"მოხარულნი ვართ, რომ "ალდაგი ბისიაის" საპენსიო ფონდმა შეინარჩუნა ზრდის მაღალი ტემპი და გადააჭარბა 2011 წლის დასაწყისში დასახულ მიზანს - მთლიანი აქტივების ღირებულების 6.5 მილიონ ლარიან მაჩვენებელს. 2012 წლის ბოლოსთვის ვგეგმავთ ამ მაჩვენებლის 7.5 მილიონ ლარამდე გაზრდას", - აღნიშნა "აბბი ასეტ მენეჯმენტის" გენერალურმა დირექტორმა ბიძინა ბეჟუაშვილმა.
"ალდაგი ბისიაის" საპენსიო ფონდი დაფუძნდა საქართველოს მოწინავე სადაზღვეო კომპანია „ალდაგი ბისიაის" მიერ 2005 წლის ივნისში. 2011 წლის დეკემბრის მდგომარეობით, საპენსიო ფონდის აქტივების ღირებულება შეადგენს 6.8 მილიონ ლარს და კლიენტთა საერთო რაოდენობა 8,500 ადამიანით განისაზღვრება. "ალდაგი ბისიაის" საპენსიო ფონდი არის საქართველოს უმსხვილესი საპენსიო ფონდი. საპენსიო პორტფელში შედის ადგილობრივი და საერთაშორისო კომპანიების ფასიანი ქაღალდები და ფულის ბაზრის ინსტრუმენტები, გრძელვადიანი დეპოზიტების ჩათვლით.
