საქართველოს სტატისტიკის ეროვნული სამსახურისა და შვედეთის სტატისტიკის ერთობლივი პროექტის ფარგლებში 15-18 იანვარს ფასების სტატისტიკის სამმართველოს თანამშრომლები სასწავლო ვიზიტით შვედეთის სტატისტიკურ სამსახურში გაემგზავრებიან. სასწავლო ვიზიტის ფარგლებში დაგეგმილია ისეთი საკითხების გაცნობა, როგორიცაა სამომხმარებლო ფასების ინდექსი (CPI), მისი დათვლის მეთოდები, წონების გადაანგარიშების თავისებურებანი და ფასების განახლების მექანიზმები. სასწავლო ვიზიტის ფარგლებში სამომხმარებლო ფასების ინდექსებთან ერთად განიხილება მწარმოებელთა ფასების ინდექსებიც (PPI). ამ მხრივ დაგეგმილია ისეთ საკითხებზე მუშაობა როგორიცაა: მონაცემთა შეგროვება, საველე სამუშაოები და იმპუტაციის მეთოდი.
საქსტატსა და შვედეთის სტატისტიკას შორის 3-წლიანი თანამშრომლობის პროექტის ფარგლებში შვედეთის სტატისტიკა საქსტატს ტექნიკურ დახმარებას უწევს ინფლაციის, მთლიანი შიდა პროდუქტის, თანამშრომელთა ტრენინგის, და სხვა ძირითადი სტატისტიკური კომპონენტების ხარისხის გაუმჯობესების მიმართულებით. პროექტის ბიუჯეტი 4 მილიონი ლარის ექვივალენტს შეადგენს შვედურ კრონებში და მთლიანად დაფინანსებულია შვედეთის საერთაშორისო განვითარების სააგენტოს (SIDA) მიერ.
