საქართველოს სტატისტიკის ეროვნულმა სამსახურმა იანვრის თვის ინფლაციის გაანგარიშების პირველი ეტაპი დაიწყო, რომელიც 10 იანვრიდან 20 იანვრის ჩათვლით ჩატარდება. კვლევის მიზანი 2012 წლის იანვარში საქართველოში ინფლაციის დონის გაანგარიშებაა.
ფასებზე დაკვირვება ფასების 20 რეგისტრატორის მიერ საქართველოს ხუთ ქალაქში: თბილისში, ქუთაისში, ბათუმში, გორსა და თელავში მოხდება. ფასები შეგროვდება 1300 სავაჭრო და მომსახურების ობიექტზე.
საველე სამუშაოების დამთავრების შემდეგ, ინფლაციის გასაანგარიშებლად იანვრის თვეში პირველად გამოიყენება განახლებული სამომხმარებლო კალათა, რომელიც ეფუძნება ეროვნულ ანგარიშთა სისტემით განსაზღვრულ მოხმარების სტრუქტურას. ეროვნული ანგარიშებიდან მიღებული წონების გამოყენება სამომხმარებლო კალათის ფორმირების პროცესში წარმოდგენს ერთ-ერთ არსებით რეკომენდაციას, რომელსაც სთავაზობს ევროსტატი ევროკავშირის წევრ-ქვეყნებს.
ახალი სამომხმარებლო კალათის პრეზენტაციას საქსტატი შემდეგ კვირაში გამართავს.
იანვრის თვის ინფლაციის მაჩვენებელი მიმდინარე წლის 3 თებერვალს გამოქვეყნდება.
