2016 წლის ივლისის ბოლომდე ბათუმში სამი ახალი სასტუმრო უნდა აშენდეს. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროდან აცნობეს, 2011 წლის ბოლოს სამი მნიშვნელოვანი ტურისტული - ინფრასტრუქტურული პროექტის განხორციელების თაობაზე, ინვესტორებთან ნასყიდობის ხელშეკრულება დაიდო.
კომპანია "GEORGIAN GROUP"-ი ბათუმში ფიროსმანის ქუჩის მიმდებარედ არსებულ 7283 კვ.მ არასასოფლო-სამეურნეო დანიშნულების მიწის ნაკვეთზე 2016 წლის 21 იანვრამდე ააშენებს და ექსპლუატაციაში შეიყვანს მინიმუმ 45 სართულიან შენობა-ნაგებობას, სადაც არანაკლებ 4 ვარსკვლავიანი სასტუმრო კომპლექსი განთავსდება. სასტუმრო არანაკლებ 100 სასტუმრო ნომერზე იქნება გათვლილი. სასტუმროს გარდა კომპლექსში საცხოვრებელი და არასაცხოვრებელი ფართები, სავაჭრო ცენტრი და შენობის ორ სართულზე ავტოსადგომი განთავსდება. ინვესტორი ვალდებულია 35 მლნ. დოლარზე მეტის ინვესტიცია განახორციელოს. კომპლექსის მშენებლობა 2012 წლის 21 ივლისამდე უნდა დაიწყოს.
იმავდროულად, ქართულ თურქული კომპანია "სისთემ ინშაათი" ბათუმშო ორ სასტუმროს ააშენებს.
როგორც აჭარის ფინანსთა და ეკონომიკის სამინისტროში განმარტავენ, ბათუმში, კახაბრის დასახლებაში მდებარე 14 443 კვ.მ მიწის ნაკვეთზე, 2016 წლის 21 იანვრამდე უნდა აშენდეს და ექსპლუატაციაში შევიდეს 5 ვარსკვლავიანი სასტუმრო კომპლექსი, რომელიც არანაკლებ 150 ნომერზე იქნება გათვლილი. სასტუმროს მშენებლობა 2012 წლის 1 ივლისამდე უნდა დაიწყოს.
ბათუმში "სისთემ ინშაათის" მეორე პროექტი შ. ხიმშიაშვილისა და კობალაძის ქუჩების კვეთაში, 12 971 კვ.მ მიწის ნაკვეთზე, არანაკლებ 100 სასტუმრო ნომერზე გათვლილ სასტუმრო კომპლექსის მშენებლობაა. სახელმწიფოსა და ინვესტორს შორის გაფორმებული ხელშეკრულების მიხედვით, სასტუმროს მშენებლობა 2012 წლის 1 ივლისამდე უნდა დაიწყოს და 2016 წლის 21 იანვრამდე სასტუმრო ექსპლუატაციაში შეიყვანოს.