”საქსტატის” საბჭოს მიერ მიღებული გადაწყვეტილების შესაბამისად, 2011 წლიდან სხვადასხვა სტატისტიკური მონაცემების გამოქვეყნების ვადები შემცირდა. როგორც დღეს წლის შემაჯამებელ ბრიფინგზე ”საქსტატის” ხელმძღვანელმა ზაზა ჭელიძემ განმარტა, 2011 წელს მთლიანი შიდა პროდუქტის კვარტალური მონაცემების გამოქვეყნების ვადა 5 დღით შემცირდა და ნაცვლად 85-ე დღისა, გამოქვეყნდება მე-80 დღეს. წელსვე პირდაპირი უცხოური ინვესტიციების ყოველკვარტალური მონაცემების გამოქვეყნების ვადა შემცირდა 5 დღით და ნაცვლად 75-ე დღისა, გამოქვეყნდება 70-ე დღეს. ასევე ბიზნეს სტატისტიკის კვარტალური მონაცემების გამოქვეყნების ვადა შემცირდა 5 დღით და ნაცვლად 70-ე დღისა, გამოქვეყნდება 65-ე დღეს; ინფლაციის ყოველთვიური მონაცემების გამოქვეყნების ვადა შემცირდა 2 დღით და ნაცვლად თვის 5 რიცხვისა, გამოქვეყნდება 3 რიცხვში. უწყებაში დაინერგა ასევე ეკონომიკის ზრდის წინასწარი შეფასებების პრაქტიკა.