დღეისათვის აჭარის ავტონომიური რესპუბლიკის საკუთრებაში 96 სააქციო საზოგადოება იმყოფება. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროდან აცნობეს, სამინისტრო აჭარის წილობრივი მონაწილებით არსებული საწარმოების მართვას ახორციელებს. 2005-2011 წლებში სამინისტროს მართვაში იმყოფებოდა სხვადასხვა დარგის 308 საზოგადოება, მათგან სხვადასხვა ფორმით ლიკვიდირებულია და მართვიდან გასულია (პრივატიზაცია, შერწყმა, გაკოტრება/ლიკვიდაცია, წილის გადაცემა და სხვა) 210 საზოგადოება. დღეის მდგომარეობით აჭარის ავტონომიური რესპუბლიკის საკუთრებაშია 96 საზოგადოება. სამინისტროში აცხადებენ, რომ აღნიშნული პროცესი ხელს უწყობს კერძო სექტორის ზრდას, არსებული საწარმოების განვითარებას და ინვესტიციების მოზიდვას.
სამინისტროს მიერ 2011 წლის დასაწყისიდან ხორციელდება მომატებული საფრთხის შემცველ ობიექტებზე კონტროლი და ასევე უსაფრთხოების წესების დაცვის კონტროლი. წლის განმავლობაში ტექნიკური დათვალიერება ჩაუტარდა 58 ახლად დამონტაჟებულ და რეაბილიტირებულ ლიფტს, რომელთაგან 55-ს ექსპლუატაციაში გაშვების უფლება მიეცა.