აჭარის ფინანსთა და ეკონომიკის სამინისტრომ 2011 წლის საქმიანობა შეაჯამა. როგორც სააგენტო "ჯი-ეიჩ-ენს" აჭარის ფინანსთა სამინისტროდან აცნობეს, სამინისტროს ძირითადი პრიორიტეტი ეფექტიანი ეკონომიკური და საბიუჯეტო მომსახურების გაწევა და უცხოურის ინვესტიციის მოზიდვა და ასევე რეგიონის მოსახლეობის სოციალურ-ეკონომიკური მდგომარეობის გაუმჯობესებაა.
სამინისტროში აცხადებენ, რომ 2011 წელს რეგიონში განხორციელდა 149 მლნ დოლარის კერძო ინვესტიცია. მთლიანი ინვესტიციის უმეტესი წილი მოდის ტურიზმის სექტორზე, სადაც 2011 წელს განხორციელდა 65 მლნ დოლარის ინვესტიცია, განსაკუთრებით მნიშვნელოვანია მშენებლობის სექტორში განხორციელებული ინვესტიცია რაც 47 მლნ აშშ დოლარის ოდენობით დაფიქსირდა. აღსანიშნავია, რომ აჭარაში დღეის მდგომარეობით 1.3 მლნ კვ მეტრის მშენებლობაზეა ნებართვა გაცემული.
2011 წელს მნიშვნელოვანი იყო სამინისტროში აჭარის საინვესტიციო სამსახურის შექმნა, სადაც ხდება პოტენციური უცხოური ინვესტორებისთვის და ადგილობრივი საქმიანი წრეებისთვის რეგიონის საინვესტიციო პოტენციალის გაცნობა, ბიზნესის მიერ ყველა დასმულ კითხვებზე დეტალური ინფორმაციის მიწოდება.
2011 წელს მნიშვნელოვანია სამინისტროს მიერ ელექტრონული აუქციონის ფორმით ქონების განკარგვა. პრივატიზირებულია 92 უძრავ მოძრავი ქონება, რის შედეგადაც ბიუჯეტში შევიდა 19 653 940 მლნ ლარი. პრივატიზირებულ პირობიან ობიექტებში განისაზღვრა 191 მლნ ლარის ინვესტიცია, რაც ხელს შეუწყობს ახალი საწარმოების, ტურისტული და სამედიცინო ობიექტების ამოქმედებას და ახალი სამუშაო ადგილების შექმნა.
სამინისტროს ანგარიშის მიხედვით, პრივატიზირებულ ობიექტებში გაიხსნა ახალი საწარმოები, აჭარული ღვინის სახლი, კინოთეატრი, სამედიცინო დაწესებულებები, ტურისტული ინფრასტრუქტურის ობიექტები, სადაც აჭარის რეგიონის მცხოვრებლებია დასაქმებული.
2011 წელს, სამინისტროსა და ნიდერლანდების სამეფოს საელჩოს შორის გაფორმებული ხელშეკრულებით მიღებული გრანტის( 250 000 ევრო) ფარგლებში დაიწყო მუშაობა აჭარის სივრცითი მოწყობის სქემის შემუშავება. დაიგეგმა მთიანი აჭარის რეკრეაციული, საკურორტო ზონების (ქედქედი, ჭარნალი, თიკერი) განვითარების გეგმა, ასევე დამუშავდა გომარდულის ტურისტული ცენტრის განვითარების პროექტი, რაც ხელს შეუწყობს ზემომთიან აჭარის ტურისტული ინფრასტრუქტურის განვითარებას.