ფინანსთა სამინისტრო კერძო სექტორიდან იმ პრობლემებისა და ხარვეზებს ნუსხას ელოდება, რაც ბიზნესს კანონმდებლობასთან ურთიერთობაში შესაძლოა გააჩნდეს. როგორც სააგენტო "ჯი-ეიჩ-ენთან" საუბრისას, ფინანსთა მინისტრის მოადგილემ რუსუდან კემულარიამ განაცხადა, 2012 წელს ბიზნესთან აქტიური ურთიერთობა კვლავ გაგრძელდება და იმ დარჩენილი პრობლემების, რომელიც ცალკეულ სექტორშია, იდენტიფიცირება მოხდება და თუ საჭირო იქნება კანონმდებლობაში შესაბამისი ცვლილებების შეტანა, სამინისტროს მხრიდან პრობლემების დარეგულირება აუცილებლად მოხდება.
რუსუდან კემულარია აცხადებს, რომ სახელმწიფოს მიერ ლიბერალური საგადასახადო კურსი კვლავ გაგრძელდება.
"2011 წელს ჩვენ არსებულ კანონმდებლობაში ძალიან ბევრი ცვლილება განვახორციელეთ. რომლის მიზანიც კანონმდებლობის გამარტივება და მისი აღქმადობის გაძლიერება იყო. ასევე მის მიზანს იმ პრობლემების იდენტიფიცირება წარმოადგენდა, რომელიც ცალკეული სექტორების მიმართ არსებობდა. ამ დროისათვის დღისწესრიგში რომელიმე გამოკვეთილი პრობლემა, როგორიც ადრე იყო - თუნდაც დანაკარგებთან და საერთაშორისო გადაზიდვებთან დაკავშირებით, ჯერ სექტორს არ დაუყენებია. წინასადღესასწაულო დღეების დასრულების შემდეგ, როცა სექტორი მუშაობას დაიწყებს და არსებული პრობლემების მოწოდება მოხდება, ჩვენ ამ პრობლემებს აუცილებლად გადავხედავთ და თუ საჭირო იქნება საკანონმდებლო ცვლილებები - განვახორციელებთ. თუ პრობლემის დარეგულირება პრაქტიკის დონეზეა შესაძლებელი, შესაბამისი მექანიზმებიც არსებობს"- განაცხადა რუსუდან კემულარიამ.
ფინანსთა სამინისტროს ინფორმაციით, 2012 წლისთვის დაგეგმილი რეფორმებია: ერთ-ერთი უმნიშვნელოვანესი მიზანი მაკროეკონომიკური სტაბილურობის შენარჩუნებასთან ერთად, წელსაც იქნება კერძო სექტორის განვითარებისთვის მაქსიმალურად ხელსაყრელი გარემოს შექმნა. ფინანსთა სამინისტრო ადასტურებს მზაობას, გააგრძელოს თანამშრომლობა კერძო სექტორთან, ახალი სამუშაო ადგილების შექმნის ხელშეწყობისა და ეკონომიკის ზრდის ჯანსაღი დინამიკის შენარჩუნების მიზნით.