ფინანსთა სამინისტროს განახლებული ვებგვერდი აქვს. როგორც დღეს ფინანსთა მინისტრმა დიმიტრი გვინდაძემ განაცხადა, ფინანსთა სამინისტროს სისტემაში მიმდინარე რეფორმებისა და სიახლეების შესახებ საზოგადოების ინფორმირება - სამინისტროს ერთ-ერთი მნიშვნელოვანი პრიორიტეტია. დიმიტრი გვინდაძის განმარტებით, განახლებულ საიტზე მუშაობა რამდენიმე თვის წინ დაიწყო. შეიცვალა საიტის დიზაინი, განახლდა საინფორმაციო ბაზები, კიდევ უფრო გამარტივდა ნავიგაცია, დაიხვეწა კანონმდებლობის საძიებო სისტემა, გადამხდელსა და ყველა დაინტერესებულ პირს შეუძლია მოიძიოს მისთვის სასურველი ინფორმაცია არა მხოლოდ სამინისტროს, არამედ მის სისტემაში შემავალი სტრუქტურების (შემოსავლების სამსახური, ხაზინა, მომსახურების სააგენტო, საგამოძიებო სამსახური, ფინანსთა სამინისტროს აკადემია, საფინანსო-ანალიტიკური სამსახური) საქმიანობის შესახებ.
ფინანსთა მინისტრი აცხადებს, რომ განახლებული საიტის ერთ-ერთი საკვანძო მიზანია - უზრუნველყოს საჯარო ფინანსების მართვის სფეროში მაქსიმალური გამჭვირვალობა და ფინანსთა სამინისტროს კომპეტენციის სფეროში შემავალი ინფორმაციის საზოგადოებისთვის ხელმწისაწვდომობა. განახლებულ ვებ-საიტზე ხელმისაწვდომია ინფორმაცია ქვეყნის ეკონომიკური და ფისკალური ტენდენციების შესახებ. განთავსებულია დეტალური ანგარიშები განხორციელებული რეფორმების, 2011 წლის შედეგებისა და 2012 წლის სამოქმედო გეგმების შესახებ.
საბიუჯეტო პოლიტიკა, ინფორმაცია სახელმწიფო ვალის მართვისა და საგარეო დაფინანსების შესახებ, ურთიერთობა სარეიტინგო სააგენტოებთან, 2012 წლის პროგრამული ბიუჯეტის ძირითადი პარამეტრები და პრიორიტეტები, დავების განხილვის სამსახურის მუშაობა, საკანონმდებლო სიახლეები, სხვადასხვა სახის სტატისტიკური მონაცემები, ელექტრონული მომსახურება - ეს არასრული ჩამონათვალია იმ მონაცემებისა, რომელთა გაცნობასაც ფინანსთა სამინისტრო სთავაზობს მომხმარებელს.
ვებ-საიტზე განთავსებულია სამინისტროს სტრუქტურა და საკონტაქტო ინფორმაცია, რომელიც ნებისმიერ დაინტერესებულ პირს უადვილებს უშუალო კონტაქტის დამყარებას სამინისტროს სისტემის შესაბამის რგოლთან. ვებ-გვერდზე ასევე ატვირთულია სამინისტროს საქმიანობის ამსახველი ფოტო და ვიდეო მასალა.
