2011 წლის განმავლობაში, ფინანსთა სამინისტროსთან არსებული დავების განხილვის საბჭოში 1680 მომართვაა რეგისტრირებული. საბჭომ წარმოება დაასრულა 1226 საჩივარზე. წარმოების ხანგრძლივობის საშუალო მაჩვენებელმა კი 27 დღე შეადგინა.
2011 წელს მიღებული გადაწყვეტილებებით მომჩივანთა მოთხოვნა 784 შემთხვევაში სრულად ან ნაწილობრივ დაკმაყოფილდა, 299 მომჩივანს უარი ეთქვა, ხოლო 143 შემთხვევაში საჩივარი განუხილველი დარჩა მომჩივნის მიერ სხვადასხვა პროცედურული მოთხოვნის დარღვევის ან დავის შეწყვეტის გამო.
ფინანსთა სამინისტროში განმარტავენ, რომ სამინისტროსთან არსებული დავების განხილვის საბჭოს სანდოობა იზრდება, რასაც 2011 წლის მანძილზე რეგისტრირებული საჩივრების რაოდენობამოწმობს.
"მიუხედავად იმისა, რომ დავების საბჭოში გასაჩივრება სავალდებულო არ არის და საქართველოს ფინანსთა სამინისტროს სისტემაში დავის ნებისმიერ ეტაპზე მომჩივანი უფლებამოსილია მიმართოს სასამართლოს, სულ უფრო მეტი მომჩივანი არჩევს გაიაროს დავების განხილვის საბჭოს ეტაპი"- განმარტავენ ფინანსთა სამინისტროში.
