2011 წელი პირველი წელია, როდესაც უმუშევრობა შემცირდა. როგორც დღეს წლის შემაჯამებელ შეხვედრაზე, პრემიერ-მინისტრმა ნიკა გილაურმა განაცხადა, უმუშევრობა წელს 15,7 %-მდე შემცირდება.
"პირველი წელია წელს, როდესაც უმუშევრობა შემცირდა. ადრე ყოველწლიურად მცირედით, მაგრამ მაინც უმუშევრობა იზრდებოდა. ეს გამოწვეული იყო იმით, რომ სახელმწიფო სექტორი თანამშრომელთა რაოდენობას ამცირებდა, კერძო სექტორი კი ზრდიდა. თუმცა წელს წინასწარი მონაცემებით უმუშევრობა 16,5 %-იდან 15,7 %-მდე შემცირდება"- განაცხადა ნიკა გილაურმა.
პრემიერ-მინისტრის განმარტებით, საქართველოს მთავარ ეკონომიკურ გამოწვევად რჩება უმუშევრობა და ახალი სამუშაო ადგილების შექმნა.
"არის ძალიან ბევრი ჩვენი თანამოქალაქე, რომელიც სამსახურს ეძებს და ვერ პოულობს. არიან ისეთებიც, რომლებთაც სამსახური აქვთ, თუმც შესაბამისი ანაზღაურება არ გააჩნიათ. სწორედ ეს არის ჩვენი ნომერ პირველი პრობლემა, რომლის გამოსწორებაზეც მთავრობა ინტენსიურად მუშაობს"- აღნიშნა ნიკა გილაურმა.
