საქართველოს პრემიერ-მინისტრ ნიკა გილაურის განცხადებით, რუსეთის ვაჭრობის მსოფლიო ორგანიზაციაში გაწევრიანებასთან დაკავშირებით საქართველოსა და რუსეთს შორის მიღწეულ შეთანხმებაზე ხელის მოწერით, მოსკოვმა საქართველოს ერთიანობა აღიარა.
"დასრულდა ძალიან რთული მოლაპარაკება რუსეთთან მსოფლიოს სავაჭრო ორგანიზაციაში გაწევრიანებასთან დაკავშირებით. ეს მოლაპარაკებებები საქართველოსთვის ძალიან წარმატებულად დასრულდა. ის კონკრეტული მოთხოვნები რაც ჩვენ გვქონდა, სრულად არის დაკმაყოფილებული. რუსეთს უნდოდა, რომ ამ დოკუმენტში ჩაწერილიყო, რომ სხვადასხვა სავაჭრო რეჟიმები იარსებებდა რუსეთსა და ოკუპირებულ ტერიტორიებს შორის და სხვა რეჟიმი რუსეთსა და დანარჩენ საქართველოს შორის. თუმცა ეს ასე არ მოხდა და ეს დოკუმენტი ამტკიცებს, რომ რუსეთსა და საქართველოს შორის არის ერთიანი სავაჭრო რეჟიმი. სინამდვილეში, პირდაპირ თუ არა პირდაპირ, რუსეთმა ხელი მოაწერა საქართველოს ერთიანობას და იმას, რომ აფხაზეთი და სამხრეთ ოსეთი საქართველოს განუყოფელი ნაწილები არიან", - აღნიშნა გილაურმა.
მისი თქმით, გარდა ამისა, მნიშვნელოვანია ამ დოკუმენტში აღწერილი მონიტორინგის რეჟიმი და დამოუკიდებელი მესამე მხარე, რომელიც წარმოადგენს მონიტორინგის რეჟიმის მონაწილეს.
"ასევე ძალიან მნიშვნელოვანია ინფორმაციის გაცვლის მექანიზმი, რადგან აქამდე არ ვიცოდით თუ რა პროდუქცია შედიოდა ოკუპირებულ ტერიტორიებზე, როგორი ტიპის ვაჭრობა იყო. ამ დოკუმენტის შემდეგ რეალურად გვეცოდინება აბსოლუტურად ყველა დეტალი, ინფორმაციის გაცვლის მექანიზმი შემუშავებული იქნება და გვეცოდინება ყველაფერი თუ რა ივაჭრება ოკუპირებულ ტერიტორიასა და რუსეთს შორის", - აღნიშნა გილაურმა 2011 წლის მუშაობის შედეგების შეჯამებისას.
