2011 წელი შეიძლება ჩაითვალოს საქართველოს საგარეო პოლიტიკის გამარჯვების წლად. ამის შესახებ საქართველოს პრემიერ-მინისტრმა ნიკა გილაურმა 2011 წლის შედეგების შეჯამებისას განაცხადა. მისი თქმით, 2008 წლიდან დაწყებული 2011 წლის ჩათვლით, რუსეთი მაქსიმალურად ცდილობდა საქართველო მოექცია საერთაშორისო იზოლაციაში, ეთქვა, რომ საქართველო არის ის ქვეყანა, რომელიც არ უნდა იყოს საერთაშორისო საზოგადოების წევრი და ეს მისი მცდელობა 2011 წელს ნამდვილად კრახით დამთავრდა.
"ერთ-ერთი მთავარი მიღწევა საქართველოს მთავრობის არის სწორედ საგარეო პოლიტიკის გამარჯვება. რუსეთის ამ მცდელობის მიუხედავად, ევროკავშირმა საქართველოსთან დაიწყო მოლაპარაკება თავისუფალი ვაჭრობის შესახებ. იმ მოლოდინებისგან განსხვავებით, რაც რუსეთს ჰქონდა, მოხდა ისე, რომ აშშ-მა და ევროპარლამენტმა მიიღეს რეზოლუცია ოკუპირებული ტერიტორიების შესახებ, რაც ჩვენი საგარეო პოლიტიკის უდიდესი წარმატებაა. ეს დარჩა იმ დოკუმენტად, რომელიც აღიარებს და რომელიც ამბობს, რომ რუსეთის ჯარი საქართველოს ტერიტორიაზე არის ოკუპანტი. ეს არის ძალიან მნიშვნელოვანი ფაქტი, რომელიც დაფიქსირდა ამ დოკუმენტებში", - აღნიშნა გილაურმა.
გილაურმა ისაუბრა ვმო-სთან დაკავშირებული მოლაპარაკებების შესახებაც რუსეთთან და აღნიშნა, რომ ეს მოლაპარაკებები საქართველოსთვის ძალიან წარმატებულად დასრულდა.