იურიდიული პირს, რომელიც პოლიტიკურ მიზნებთან დაკავშირებით კანონის მოთხოვნას დაარღვევს, ლიკვიდაცია ემუქრება. აღნიშნულთან დაკავშირებით ცვლილება "სისხლის სამართლის კოდექსში" პარლამენტმა მესამე მოსმენით დაამტკიცა.
მიღებული გადაწყვეტილების თანახმად, პოლიტიკური მიზნით პირდაპირ ან არაპირდაპირ, ფულის, ფასიანი ქაღალდის (მათ შორის ფინასური ინსტრუმენტის) სხვა ქონების, ქონებრივი უფლების ან მომსახურების ან და სხვა რაიმე უპირატესობის შეთავაზება, დაპირება (გარდა დაპირებისა, რომელიც უკავშირდება საბიუჯეტო რესურსების სამომავლო განაწილებას), გადაცემა, ან ასეთი მოთხოვნა ან მიღება, აგრეთვე მოჩვენებითი, თვალთმაქცური ან სხვა გარიგების დადება კანონით დადგენილი შეზღუდვების თავიდან არიდების მიზნით ისჯება თავისუფლების აღკვეთით ვადით სამ წლამდე ან ჯარიმით.
ამასთან, ამ მუხლით გათვალისწინებული ქმედებისთვის იურიდიული პირი ისჯება ლიკვიდაციით ან საქმიანობის უფლების ჩამორთმევით ან ჯარიმით.
კანონპროექტის ერთ-ერთი ავტორის, უმრავლესობის წევრის ჩიორა თაქთაქიშვილის მტკიცებით, აღნიშნული კანონის მიღების შემდეგ ლიკვიდაცის საშიშროება პოლიტიკურ პარტიებს არ შეექმნებათ, შესაბამისად მისი კანონში ცალკე პუნქტად ასახვის საჭიროებაც არ არის.
აღნიშნულ ნორმასთან დაკავშირებით არასამთავრობო ორგანიზაციები მის დეტალურ გაწერას ითხოვდნენ, რათა პოლიტიკური პარტიებს ლიკვიდაციის საფრთხე არ დაემუქროთ.