"GIG TAXI"-ი 2011 წელს დადებითად აფასებს. როგორც სააგენტო "ჯი-ეიჩ-ენთან" საუბრისას, "GIG TAXI" -ის მმართველმა დირექტორმა კოტე თოფურიამ განაცხადა, 2011 წელს 2010 წელთან შედარებით კომპანიის დაკვეთები 8 %-ით გაიზარდა.
"2011 წელს "GIG TAXI"-ის დაკვეთები 8-ით გაიზარდა, რაც ნიშნავს იმას, რომ კომპანიის მიმართ ნდობა იზრდება. დაკვეთების ზრდას ვუკავშირებთ ასევე იმასაც, რომ სულ ხაზზე ახალი მანქანები გავიდა და დღეისათვის კომპანია საკუთარ კლიენტურას მუდმივად ხაზზე მყოფი 180 მანქანით ემსახურება."- განაცხადა კოტე თოფურიამ.
კომპანიაში უკვე დაწყებულია რებრენდინგი. პროექტის ფარგლებში შეცვლილია კომპანიის ლოგო და კოტე თეფურიას განმარტებით, რებრენდინგი 2012 წელსაც გაგრძელდება. 2012 წლისთვის "GIG TAXI"-ი ხაზზე დამატებითი მანქანების გამოყვანასაც გეგმავს.
"GIG TAXI" -ის მმართველ დირექტორს კოტე თოფურიას იმედი აქვს, რომ სფეროს რეგულირების შემდეგ კომპანიის დაკვეთები კიდევ გაიზრდება.
კოტე თოფურის თქმით, სფეროს რეგულაცია ძალზედ ფაქიზი საკითხია, თუმც მას შემდეგ რაც ხელისუფლებამ სამარშუტო ტაქსების ბიზნესის რეგულირება მოახდინა, "GIG TAXI" -ის ხელმძღვანელის აზრით, ამის შემდეგ იმედია ხელისუფლება ტაქსების ბაზრის რეგულირებასაც მოახდენს.
როგორც ცნობილია, "GIG TAXI"-ი საწვავად, ძირითადად, აირს იყენებს, რაც მენეჯმენტს საშუალებას აძლევს, ხარჯი 50 %-ით შეამციროს. კომპანიის ხელმძღვანელის განმარტებით, სწორედ ამ გზით კომპანია ახერხებს, ბაზარზე მომსახურეობის ტარიფიც შედარებით დაბალი ტარიფით შეინარჩუნოს. ტაქსოპარკს აქვს საერთაშორისო სტანდარტების შესაბამისი სერვისცენტრი, სადაც ტაქსები გადიან სავალდებული ტექნიკურ დათვალიერებას, ეს კი უზრუნველყოფს მგზავრის უსაფრთხო გადაადგილებას.
გამართული მუშაობისთვის, "GIG TAXI"-მა ქოლცენტრის გადაიარაღებაც მოახდინა, რაც კომპანიას საშუალებას აძლევს, კლიენტურას უფრო კომფორტულად მოემსახუროს.
ამ დროისთვის "GIG TAXI"-ი მხოლოდ თბილისშია წარმოდგენილი, თუმცა მას შემდეგ, რაც კომპანია ბაზარზე წილს გაზრდის, რეგიონებში სერვისცენტრების გახსნაზედაც იმსჯელებს.
"GIG TAXI"-ს აქვს ექსკლუზიური უფლება თბილისის საერთაშორისო აეროპორტთან, რომლის მიხედვითაც, მგზავრებისა და თავად კომპანია "ტავის" გადაადგილებაზე უშუალოდ "GIG TAXI"-ი ზრუნავს.
კომპანიაში აცხადებენ, რომ კომპანია კლიენტებს მოსახერხებელ გადაადგილებას სთავაზობს თბილისის საერთაშორისო აეროპორტსა და საქართველოს ნებისმიერ რეგიონს შორის. მგზავრებს საშუალება აქვთ, წინასწარ შეუკვეთონ აეროპორტში დახვედრა (ჩამოსვლის, გამგზავრებისას).
შეგახსენებთ, რომ კომპანია "GIG TAXI"-ი არის ტაქსებით მომსახურების წამყვანი კომპანიის, "ქართული საინვესტიციო ჯგუფი XXI"-ს ნაწილი. "GIG TAXI"-ი ქართულ ბაზარზე გამოჩნდა 2007 წელს, როდესაც განახორციელა მნიშვნელოვანი ინვესტიცია ტაქსებით მომსახურების სექტორში. კომპანიამ თბილისში მოღვაწეობა 2007 წლის სექტემბერში 100 ავტომანქანით დაიწყო. მოგვიანებით კომპანიამ შემოიყვანა დაახლოებით 330 მანქანა საქართველოში. 2009 წლის მარტში "GIG TAXI"-ს მიენიჭა "ხარისხის ნიშანი".
