ქობულეთში მუნიციპალური პროგრამით 11 მრავალსართულიანი სახლის ოცდაერთი ლიფტის რეაბილიტაცია ჩატარდა (მათ შორის დამონტაჟდა ორი ახალი). სამუშაოების დასრულების შემდეგ, მუნიციპალიტეტის თხოვნის საფუძველზე, აჭარის ფინანსთა და ეკონომიკის სამინისტროს ტექნიკური ზედამხედველობის სამსახურის მიერ მოხდა ლიფტების წინასწარი ტექნიკური დათვალიერება და გამოვლენილი ხარვეზების აღმოსაფხვრელად მიეცა სათანადო რეკომენდაციები.
ლიფტების ტექნიკური დოკუმენტაციის მოწესრიგების მიზნით აღდგენილი იქნა ძველი ლიფტების პასპორტები, მოძიებული და წარმოდგენილი იქნა ლიფტებზე შეცვლილი ძირითადი აგრეგატებისა და ბაგირების წარმოშობისა და შესაბამისობის სერთიფიკატები, ასევე ტექზედამხედველობის სამსახურის მითითებით დარეგულირდა და მოწესრიგდა ზოგიერთი ლიფტის უსაფრთხოების სისტემა (დამჭერები, სიჩქარის შემზღუდველი, სამუხრუჭე სისტემა). ამხანაგობებს მიეცა რეკომენდაცია ლიფტების უსაფრთხო ექსპლუატაციაზე კვალიფიცირებული პასუხისმგებელი პირის თაობაზე.
ხარვეზების გამოსწორების შემდეგ კომისიური წესით მოხდა ოცდაერთივე რეაბილიტირებული ლიფტის ჩაბარება და ექსპლუატაციაში გაშვება.