ხელვაჩაურში სასტუმროს ასაშენებლად აჭარის მთავრობა ინვესტორს ეძებს. აჭარის ფინანსთა და ეკონომიკის სამინისტროს ინფორმაციით, 29 დეკემბრისათვის დაგეგმილ, პირობებიან აუქციონზე ხელვაჩაურის მუნიციპალიტეტის სოფელ განთიადში მდებარე 6317,9 კვმ. დაუმთავრებელი მშენებლობა და მასზე მიმაგრებული 19167 კვმ. არასასოფლო-სამეურნეო დანიშნულების მიწის ნაკვეთი იყიდება. აუქციონის პირობების მიხედვით, მყიდველი ვალდებული იქნება, პირობებიანი ელექტრონული აუქციონის დასრულებიდან 24 თვის ვადაში ექსპლუატაციაში შეიყვანოს მრავალფუნქციური შენობა-ნაგებობა, სადაც განთავსდება სასტუმრო არანაკლებ 36 ნომრით და არანაკლებ 40 მაღაზია, რისთვისაც ინვესტირებული იქნება არანაკლებ 1 მლნ. ლარი.
მყიდველი ვალდებულია, ასევე ნასყიდობის ხელშეკრულების გაფორმებიდან 1 თვის ვადაში სამინისტროში წარადგინოს საინვესტიციო ვალდებულებები არანაკლებ 10%-ის ოდენობით უპირობო და გამოუხმობი საბანკო გარანტია/ბე რომლის ვადაც არანაკლებ 2 თვით უნდა აღემატებოდეს საინვესტიციო ვალდებულებების შესრულების ვადას.