საქართველოს პრემიერ-მინისტრმა ნიკა გილაურმა ტუროპერატორებს და მცირე სასტუმროების მფლობელებს მეტი აქტიურობისკენ მოუწოდა. ამის შესახებ გილაურმა ჟურნალისტებს სასტუმრო ჰოლიდეი ინში ტურიზმის ეროვნული სააგენტოს მიერ წლის შემაჯამებელი ღონისძიების ფარგლებში კერძო სექტორთან გამართული შეხვედრის დასრულების შემდეგ განუცხადა და აღნიშნა, რომ მთლიანობაში 2011 წელი ტურიზმის კუთხით წარმატებული იყო.
"წელს ვიზიტორების რეკორდულად მაღალი მაჩვენებელი დაფიქსირდა. გასულ წელთან შედარებით 40-პროცენტიანი მატება გვაქვს. მომავალ წელს კი ვიზიტორების დაახლოებით 25-30 პროცენტიან ზრდას ველოდებით. რაც იმას ნიშნავს, რომ საქართველოში ტურიზმი მზარდია. ეს კარგი ბიზნესია, რადგან ვითარდება მცირე და საშუალო სეგმენტი და ბევრი ადამიანი საქმდება. დღეს შევხვდით ტურ-ოპერატორებს და მცირე სასტუმროების მფლობელებს. ვისაუბრეთ იმაზე თუ რა პრობლემები აქვთ მათ და რა შეიძლება გამოსწორდეს. ჩემი აზრით, კერძო სექტორს უფრო მეტი აქტივობა მართებს, მაგრამ მთავრობასაც შეუძლია რომ დაეხმაროს. მაგალითად, მაშინ როცა საუბარი ელექტრონულ ჯავშანს ეხება", - განაცხადა გილაურმა.
ამასთან პრემიერმა აღნიშნა, რომ ტურ ოპერატორების და მცირე სასტუმრპოების მფლობელთა პრობლემები გათვალისწინებული იქნება და მომავალ წელს მთავრობა მათ სიახლეებს შესთავაზებს.