ხვალ, 27 დეკემბერს 11:00 საათზე სასტუმრო Holiday Inn-ში ტურიზმის ეროვნული სააგენტო წლის დასკვნით ღონისძიებას გამართავს, სადაც სააგენტოს თავმჯდომარე მაია სიდამონიძე 2011 წლის შედეგებს შეაჯამებს და ასევე 2012 წლის სამოქმედო გეგმას წარმოადგენს.
პრეზენტაციას დაესწრებიან და ანგარიშს ჩაიბარებენ: პრემიერ-მინისტრი ნიკა გილაური და ეკონომიკისა და მდგრადი განვითარების მინისტრი ვერა ქობალია.
ღონისძიებაზე მოწვეულნი არიან მედიის, კერძო სექტორის, დიპლომატიური კორპუსისა და საერთაშორისო ორგანიზაციების წარმომადგენლები.
როგორც სააგენტო "ჯი-ეიჩ-ენს" ტურიზმის ეროვნული სააგენტოდან აცნობეს, ღონისძიებაზე შეკრებილ საზოგადოებას შესაძლებლობა ექნება წლის შემაჯამებელ სტატისტიკურ მონაცემებსა და ქვეყნის მასშტაბით განხორციელებულ პროექტებს გაეცნონ, როგორიცაა ახალი ტურისტული პროდუქტის შექმნა, მცირე ტურისტული ინფრასტრუქტურის განვითარება, ახალი ტურიზმის საინფორმაციო ცენტრების გახსნა და არსებულის რეკონსტრუქცია, კახეთის რეგიონის ტურისტული განვითარების პროგრამა, რეგიონებში ტურისტული ნაკადის ზრდის მიზნით ჩატარებული მასშტაბური კულტურული ღონისძიებები.
შეხვედრაზე შეჯამდება ასევე ტურიზმის სფეროში განათლების კუთხით განხორციელებული პროექტები, როგორებიც არის პროფესიული სტანდარტების შემუშავება, ტრენინგები რეგიონებში კერძო სექტორის წარმომადგენლებისათვის, კადრების დასაქმებისა და კვალიფიკაციის ამაღლების მიზნით განხორციელებული პროექტი - „კარიერის კვირეულის" შედეგები და სხვა.
პრეზენტაციაზე დეტალურად იქნება წარმოდგენილი 2011 წელს განხორციელებული მარკეტინგული პროექტები: 20 საერთაშორისო და ადგილობრივ გამოფენაში მონაწილეობა, პრეს და გაცნობითი ტურები უცხოელი ჟურნალისტებისა და ტურ-ოპერატორებისათვის, ახალი სატელევიზიო ვიდეოკლიპების მომზადება და განთავსება როგორც ქვეყნის შიგნით, ასევე საზღვრებს გარეთ მიზნობრივ ბაზრებზე, Travel Channel-თან თანამშრომლობით დოკუმენტური ფილმების შექმნა, რომელიც გადაიცემა 117 ქვეყანაში 18 ენაზე.
2011 წლის ანგარიშის შემდეგ წარმოდგენილი იქნება 2012 წლის სამოქმედო გეგმის ძირითადი მიმართულებები. მათ შორის არის ქვეყნის რებრენდინგი, აქტიური მარკეტინგული კამპანიები შიდა და საერთაშორისო ბაზრებზე, ახალი ტურისტული პროდუქტების შექმნა, საერთაშორისო დონის სასწავლო ცენტრის ჩამოყალიბება, რაც ხელს შეუწყობს ტურიზმის სფეროში მაღალკვალიფიციური კადრების მომზადებას და ამ სფეროში დასაქმების მაჩვენებლის გაზრდას. ასევე, შეიქმნება დასაქმების პორტალი, ბიბლიოთეკა და კვლევისა და განვითარების ცენტრი, რომელიც ხელმისაწვდომს გახდის სპეციალიზირებულ ლიტერატურას და ხელს შეუწყობს ტურიზმის სფეროში სამეცნიერო საქმიანობის წახალისებას.
