დონორთა კიდევ ერთი მხარდაჭერა საქართველოს სოფლის მეურნეობის განვითარებისთვის. იაპონიის მთავრობამ საქართველოს საგრანტო პროგრამის ფარგლებში, სოფლის მეურნეობის მხარდასაჭერად დამატებით 7.3 მლნ ლარი გამოყო.
ფინანსთა სამინისტროს ინფორმაციით, აღნიშნული პროგრამა 1997 წლიდან მიმდინარეობს. მის ფარგლებში იაპონიის მთავრობის მიერ საქართველოსთვის ამ წლების მანძილზე უკვე გამოყოფილია დაახლოებით 50 მლნ ლარის ოდენობის საგრანტო რესურსი სოფლის მეურნეობის მექანიზაციის მხარდასაჭერად.
„ესაა ახალი დახმარება იაპონიის მთავრობიდან. საქართველოს და იაპონიის მხარეებს შორის ბოლო პერიოდში მიღწეული შეთანხმების შესაბამისად, სოფლის მეურნეობის მხარდასაჭერად პროგრამის ფარგლებში შექმნილი საპარტნიორო ფონდიდან გრანტის სახით გამოიყოფა დამატებით 7,3 მლნ ლარი. განსაკუთრებით მინდა ავღნიშნო, რომ ამ დახმარებას ვიღებთ მიუხედავად იმ ტრაგედიისა, რომელიც დატრიალდა იაპონიაში. პირველივე გზავნილი, რომელიც მივიღეთ იაპონიიდან იყო ის, რომ ის პროგრამები, რომლებიც არსებობს ჩვენს ქვეყნებს შორის, აუცილებლად გაგრძელდება, რისთვისაც დიდ მადლობას ვუხდით იაპონიის მთავრობასა და იაპონიის საელჩოს საქართველოში," - განაცხადა ფინანსთა მინისტრმა დიმიტრი გვინდაძემ, დღეს ფინანსთა სამინისტროში გამართულ ბრიფინზე.ბრიფინგს ასევე ესწრებოდნენ სოფლის მეურნეობის მინისტრი ზაზა გოროზია და საქართველოში იაპონიის საგანგებო და სრულუფლებიანი ელჩი მასაიოში კამოჰარა.
დიმიტრი გვინდაძის თქმით, დაფინანსება ითვალისწინებს სოფლის მეურნეობის უზრუნველყოფას ახალი, უფრო თანამედროვე სასოფლო-სამეურნეო ტექნიკით.
სოფლის მეურნეობაში ახალი ტექნიკის დანერგვით შესაძლებელი იქნება დამატებით მიწების დამუშავება. სოფლის მეურნეობის მექანიზაციის გაზრდა და თანამედროვე სასოფლო-სამეურნეო ტექნიკის დანერგვა ხელს შეუწყობს ამ სექტორში ეფექტიანობის ამაღლებას, შემოსავლების ზრდასა და კეთილდღეობის გაუმჯობესებას.
სოფლის მეურნეობის განვითარება „მოდერნიზაციისა და დასაქმებისთვის" საქართველოს მთავრობის სტრატეგიული 10-პუნქტიანი გეგმის ერთ-ერთი მნიშვნელოვანი პრიორიტეტია. აღნიშნული დარგის განვითარების მიზნით, 2012 წლის ბიუჯეტით გათვალისწინებულია გაზრდილი ასიგნებები. მიმდინარეობს ინტენსიური მუშაობა დონორ ორგანიზაციებთან და ქვეყნებთან, სოფლის მეურნეობის დარგში მიმდინარე პროექტების განხორციელების ხელშეწყობის და ახალი პროექტების დაწყების მიზნით. სახელმწიფოს მიერ იქმნება ყველა პირობა იმისათვის, რომ სოფლის მეურნეობაში ჩაიდოს ახალი კერძო ინვესტიციები, ხელი შეეწყოს დასაქმებას და პროდუქტიულობის დონის გაზრდას.
