2011 წლის III კვარტალში ყველაზე მეტი ინვესტიცია ენერგეტიკის სექტორში განხორციელდა. სტატისტიკური ინფორმაციის მიხედბით, მესამე კვარტალში წინასწარი მონაცემებით, ენერგეტიკის სექტორში 86 მლნ. დოლარის ინვესტირება მოხდა.
"საქსტატის" ინფორმაციის მიხედვით, მესამე კვარტალში ენერგეტიკის სექტორის შემდეგ, ინვესტორებისათვის მიმზიდველი საფინანსო სექტორი აღმოჩნდა, სადაც წინასწარი მონაცემებით, პირდაპირი უცხოირი ინვესტიციების 19 %-ია ინვესტირებული.
სტატისტიკური ინფორმაციის მიხედვით, მრეწველობაში ინვესტირებულია 11 %-ი, უძრავ ქონებაში - 8%-ი, ტრანსპორტსა და კავშირგაბმულობაში - 6 %-ი, ჯანდაცვაში - 5 %-ი, ხოლო სხვა სექტორებში 19 %-ი.
შეგახსენებთ, "საქსტატის" ინფორმაციით, III კვარტალში ქვეყანაში განხორციელებული პირდაპირი უცხოური ინვესტიციების მოცულობამ 266 მლნ. აშშ დოლარი შეადგინა, რაც 66 პროცენტით აღემატება 2010 წლის წინასწარ და 18 პროცენტით ამავე პერიოდის დაზუსტებულ მაჩვენებელს, ხოლო მიმდინარე წლის II კვარტალზე 31 პროცენტით მეტია.
ამასთან, I-III კვარტლების ჯამური წინასწარი მონაცემები 49 პროცენტით აჭარბებს 2010 წლის შესაბამისი პერიოდის წინასწარ და 7 პროცენტით ამავე პერიოდის დაზუსტებულ მაჩვენებელს.
"საქსტატის" ინფორმაციით, 2011 წლის I-III კვარტალში საქართველოში განხორციელებულმა პირდაპირმა უცხოურმა ინვესტიციებმა ჯამურად 643 მლნ. აშშ დოლარი შეადგინა, ხოლო შვიდი უმსხვილესი პირდაპირი ინვესტორი ქვეყნის წილმა - 79 პროცენტი.
