საქართველოში ინფოკომუნიკაციების განვითარების პოლიტიკის შესახებ სპეციალური პაკეტის მზადდება, რომელიც საშუალო და გრძელვადიან პერიოდში ქვეყანაში ინფოკომუნიკაციების თანამედროვე საშუალებების სწრაფ ინოვაციურ განვითარებას უზრუნველყოფს.
სწორედ ამ მიზნით, სასტუმრო "შერატონ მეტეხი პალასში" საქართველოს ეკონომიკისა და მდგრადი განვითარების სამინისტროს და ევროპის რეკონსტრუქციისა და განვითარების ბანკის - EBRD ორგანიზებით გაიმართა კონფერენცია-სემინარი "საქართველოში ინფოკომუნიკაციების განვითარების პოლიტიკის აქტუალური საკითხები".
ღონისძიება საქართველოს ეკონომიკისა და მდგრადი განვითარების მინისტრმა გახსნა. თავის გამოსვლაში ვერა ქობალიამ ჩვენს ქვეყანაში ინფოკომუნიკაციების განვითარების კუთხით არსებულ მდგომარეობასა და სამომავლო პერსპექტივებზე ისაუბრა.
"დარწმუნებულები ვართ, რომ ევროპის რეკონსტრუქციისა და განვითარების ბანკის (EBRD) და ფინეთის მთავრობის ტექნიკური დახმარების პროექტის ფარგლებში დაგეგმილი სამუშაოები, რომელიც წამყვანი საერთაშორისო ექსპერტების ჩართვას გულისხმობს, საქართველოს მთავრობისათვის ICT დარგში რეკომენდაციების მოსამზადებლად, დიდ შედეგს მოგვცემს. ჩვენ საშუალება გვექნება საუკეთესო საერთაშორისო გამოცდილების გათვალისწინებით დავხვეწოთ ICT სფეროს საკანონმდებლო - ნორმატიული ბაზა, გავაკეთოთ გრძელვადიანი დაგეგმარება ქვეყნის ICT დარგის განვითარების ხელშეწყობისათვის. რეფორმა, რომლის განხორციელებას ჩვენი სამინისტრო, აქტიური თანამშრომლობით საქართველოს კომუნიკაციების ეროვნული კომისიასთან ერთად გეგმავს ხელს შეუწყობს ამ მეტად მნიშვნელოვან სფეროში კონკურენციისა და მეწარმეობის შემდგომ განვითარებას, ინვესტიციების მოზიდვას, ახალი სამუშაო ადგილების შექმნას, ქვეყნის ეკონომიკურ, სოციალურ და კულტურულ განვითარებას" - განაცხადა ვერა ქობალიამ.
კონფერენცია-სემინარი წარმოადგენს ტექნიკური დახმარების მრავალთვიანი პროგრამის „საქართველო: ინფოკომუნიკაცების პოლიტიკა და რეგულირების განვითარება" ნაწილს, რომელსაც მთავრობის ეკონომიკური რეფორმების მხარდასაჭერად EBRD და ფინეთის მთავრობა საქართველოს ეკონომიკისა და მდგრადი განვითარების სამინისტროსთან და კომუნიკაციების ეროვნულ კომისიასთან თანამშრომლობით ახორციელებენ.
პროგრამის მთავარი მიზანია საქართველოში ინფოკომუნიკაციების განვითარების პოლიტიკის შესახებ პაკეტის მომზადება. იგი საშუალო და გრძელვადიან პერიოდში უზრუნველყოფს ქვეყანაში ინფოკომუნიკაციების თანამედროვე საშუალებების სწრაფ ინოვაციურ განვითარებას, ამ სფეროში მეწარმეობის განვითარებასა და ინვესტიციების მოზიდვას, გლობალურ ქსელებში ღრმა ინტეგრაციას, საინფორმაციო საზოგადოების ჩამოყალიბებასა და ქვეყნის მრავალმხრივი განვითარების ხელშეწყობას.
კონფერენცია-სემინარის მონაწილეთა მიერ გამოთქმული მოსაზრებები და წინადადებები ხელს შეუწყობს ქვეყანაში ინფოკომუნიკაციების განვითარების პოლიტიკის კომპლექსური პროექტის შემუშავებას, რომელიც ევროპის რეკონსტრუქციის და განვითარების ბანკის, ფინეთის მთავრობის, საქართველოს ეკონომიკისა და მდგრადი განვითარების სამინისტროს და საქართველოს კომუნიკაციების ეროვნული კომისიის ერთობლივი თანამშრომლობით 2012 წელს დასრულდება.