ფრაქცია "ერთობა სამართლიანობისათვის" წევრმა დიმიტრი ლორთქიფანიძემ სასჯელაღსრულების, პრობაციისა და იურიდიული დახმარების საკითხთა მინისტრს ხათუნა კალმახელიძეს უსაყვედურა.
ლორთქიფანიძის თქმით, მინისტრს ერთი სიტყვაც არ უთქვამს სასჯელაღსრულების დაწესებულებებში პატიმართა არაადამიანური მოპყრობისა და წამების ფაქტებზე, რაც სახალხო დამცველის 2010 წლის ანგარიშში არის ნახსენები და რასთან დაკავშირებით საუბრის პირობაც მინისტრმა ერთი წლის წინ დადო.
ორი კომიტეტის სხდომაზე, ადამიანის უფლებათა დაცვის კომიტეტის თავმჯდომარე ლაშა თორდიამ ლორთქიფანიძის პასუხად აღნიშნა, რომ კალმახელიძე პარლამენტში ამ საკითხზე სასაუბროდ არ იყო მიწვეული. შესაბამისად, მინისტრს ამაზე ახსნა-განმარტება არ გაუკეთებია.
ლორთქიფანიძემ დღეს კომუნიკაციის პრობლემის არსებობის გამო საყვედური ხსენებული სამინისტროს პრესცენტრის მისამართითაც გამოთქვა.
"რა შუაშია პრესცენტრი, როცა ახლა თავისუფლების შეზღუდვის დაწესებულების შექმნაზე ვსაუბრობთ? ყოველთვის შეგიძლიათ, პირადად მე დამიკავშირდეთ. მაგრამ ამას მიკროფონთან აკეთებთ", - მიმართა კალმახელიძემ ლორთქიფანიძეს.