შეხვედრაზე, რომელიც აღნიშნული საბჭოს თხოვნით იმართება, ფინანსთა მინისტრმა საბჭოს წევრებს დეტალური ინფორმაციას მიაწოდა „საქართველოს მთავრობის სტრატეგიული „ათპუნქტიანი გეგმის" მოდერნიზაციისა და დასაქმებისათვის" შესახებ.

ფინანსთა მინისტრმა დიპლომატიური მისიების წარმომადგენლებს გაუკეთა დეტალური ანალიზი ქვეყანაში მიმდინარე დადებითი ეკონომიკური და ფისკალური ტენდენციების შესახებ (სტრუქტურული რეფორმები, საბიუჯეტო პოლიტიკა, სახელმწიფო ვალის მართვა და მდგრადობა, ურთიერთობა სარეიტინგო სააგენტოებთან და ა.შ.). ასევე მიმოიხილეს 2011 წლის სახელმწიფო ბიუჯეტის შესრულების დინამიკა და 2012 წლის ბიუჯეტის პროექტის ძირითადი პარამეტრები და პრიორიტეტები. ფინანსთა მინისტრის პრეზენტაციაში ცალკე ადგილი დაეთმო საქართველოს მოწინავე პოზიციებს საერთაშორისო საფინანსო ორგანიზაციების ოფიციალურ ანგარიშებში.

„შეხვედრის მიზანი იყო დიპლომატიური მისიის წარმომადგენლებისთვის გაგვეცნო მთავრობის 10-პუნქტიანი გეგმა. მიმოვიხილეთ ის რეფორმები, რომელიც ფინანსთა სამინისტროს სისტემაში განხორციელდა 2011 წელს და რას ვგეგმავთ 2012 წლისთვის. დღეს შევხვდით სხვადასხვა საელჩოების ეკონომიკურ მრჩევლებს. მათ ფუნქციებში პირდაპირ შედის ქვეყნებს შორის ეკონომიკური და საინვესტიციო ურთიერთობების წახალისება. შესაბამისად, ამ ხალხის ინფორმირებულობაზე დამოკიდებულია მათი ყოველდღიური ძალისხმევა იმისთვის, რომ საქართველოში წახალისდეს უცხოური ინვესტიციები," - განაცხადა საქართველოს ფინანსთა მინისტრმა დიმიტრი გვინდაძემ.

შეხვედრაზე განიხილეს ფინანსთა სამინისტროს სისტემაში 2012 წლისთვის დაგეგმილი რეფორმები, რომელთა ერთ-ერთი უმნიშვნელოვანესი მიზანია - კერძო სექტორის განვითარებისთვის მაქსიმალურად ხელსაყრელი გარემოს შექმნა. საუბარი შეეხო შემდგომ რეფორმებს როგორც საგადასახადო პოლიტიკის ასევე ადმინისტრირების კუთხით. ამ მხრივ, ფინანსთა სამინისტრო კვლავაც ადასტურებს მზაობას, გააგრძელოს ნაყოფიერი თანამშრომლობა კერძო სექტორთან, ახალი სამუშაო ადგილების შექმნის და ეკონომიკის ზრდის სწრაფი დინამიკის შენარჩუნების მიზნით.

აღნიშნული შეხვედრა კარგ შესაძლებლობას იძლევა საქართველოს პარტნიორი ქვეყნების დიპლომატიურ წარმომადგენლებს მიეწოდოს სრულყოფილი და ობიექტური ინფორმაცია მთავრობის ძირითადი პრიორიტეტებისა და სამომავლო სტრატეგიის შესახებ. ამგვარი დიალოგი ხელს უწყობს ტრანსპარენტულობის პრინციპის გამყარებას და ურთიერთანამშრომლობას ინფორმაციის გაცვლის კუთხით. აღნიშნული დიალოგი ასევე ხელს უწყობს ქვეყანაში უცხოური ინვესტიციების მოზიდვას და ზოგადად, ქვეყნის მიმართ ინტერესის შემდგომ განვითარებას.

აღსანიშნავია, რომ 2009 წელს შექმნილი ეკონომიკური მრჩევლების საბჭოს ძირითადი მიზანია ფორუმების ორგანიზება საქართველოს შესახებ ეკონომიკური ინფორმაციების გაცვლისთვის, ახალი ინვესტიციების მოზიდვის ხელშეწყობა ქვეყანაში და საქართველოს მთავრობის მხარდაჭერა მომავალი ეკონომიკური რეფორმების რეალიზაციაში. საბჭოს წევრებს შორის არიან: ევროკავშირის წარმომადგენლობის, ამერიკის შეერთებული შტატების, დიდი ბრიტანეთის, გერმანიის, ჰოლანდიის, იტალიის, შვეიცარიის, ჩეხეთის, პოლონეთის, რუმინეთის, უნგრეთის, საბერძნეთის, თურქეთის, ირანის, ჩინეთის, იაპონიის, აზერბაიჯანის, უკრაინის, ლატვია, ლიტვა, ესტონეთის დიპლომატიური მისიების ხელმძღვანელთა ეკონომიკური მრჩევლები.