ბულგარეთსა და საქართველოს შორის პირდაპირი ავიარეისების დანიშვნაზე, საქართველოს ეკონომიკისა და მდგრადი განვითარების მინისტრი ბულგარეთის მთავრობის წევრებს ესაუბრა.
ეკონომიკისა და მდგრადი განვითარების სამინისტროს ინფორმაციით, ვერა ქობალიამ ბულგარეთში ვიზიტის ფარგლებში შეხვედრა გაიმართა ვერა ქობალიასა და ბულგარეთის რესპუბლიკის ტრანსპორტის, საერთაშორისო ტექნოლოგიებისა და კომუნიკაციების მინისტრის ივაილო მოსკოვსკის პირისპირ შეხვედრა, რომლის დროსაც მინისტრებმა განიხილეს ორი ქვეყნის თანამშრომლობის საკითხები ტრანსპორტის, მათ შორის საავტომობილო გადაზიდვების ინტენსიფიკაციის, შავ ზღვაზე საბორნე მიმოსვლის გააქტიურებისა და ქვეყნებს შორის პირდაპირი ფრენების დაწყების შესახებ. გარდა ამისა, გამოიკვეთა საინტერესო მიმართულებები საინფორმაციო ტექნოლოგიებისა და კომუნიკაციების სფეროში თანამშრომლობის შესახებ.
პირისპირ შეხვედრის შემდეგ, მინისტრებმა გახსნეს საქართველო-ბულგარეთის მთავრობათაშორისი კომისიის მეოთხე სხდომა. ვერა ქობალია და ივაილო მოსკოვსკი კომისიის თანათავმჯდომარეები არიან. კომისიის სხდომის ოქმზე ხელმოწერა 6 დეკემბერს გაიმართა.
შავ ზღვაზე საბორნე გადასასვლელის უფრო ეფექტურად გამოყენება და ტვირთბრუნვის გაზრდა, საავტომობილო გადაზიდვების გააქტიურება, ორ ქვეყანას შორის პირდაპირი ავიამიმოსვლის დაწყება, ეს არის მცირე ჩამონათვალი საკითხებისა, რომელიც აისახა ორი ქვეყნის სამთავრობო კომისიის სხდომის ოქმის საბოლოო ვერსიაში. ტრანსპორტის გარდა, გამოიკვეთა სხვა სტრატეგიული მიმართულებები, როგორიცაა აგროსექტორი, ენერგეტიკა და ტურიზმი.
ვიზიტის ფარგლებში საქართველოს ეკონომიკისა და მდგრადი განვითარების მინისტრი ვერა ქობალია, ბულგარეთის რესპულიკის ეკონომიკის, ენერგეტიკისა და ტურიზმის მინისტრ ტრაიჩო ტრაიკოვთან ერთად მიესალმა საქართველო-ბულგარეთის ბიზნეს-ფორუმის მონაწილეებს. მოგვიანებით, ბულგარეთის წამყვანი კომპანიების ხელმძღვანელებმა მოისმინეს საქართველოს ეროვნული საინვესტიციო სააგენტოს პრეზენტაცია საქართველოს საინვესტიციო პოტენციალის შესახებ.
სამინისტროს ინფორმაციით, ბულგარეთში იზრდება ინტერესი საქართველოს, როგორც სავაჭრო-ეკონომიკური პარტნიორი ქვეყნის, მიმართ. ბულგარეთი უკვე საქართველოს უმსხვილესი სავაჭრო ქვეყნების ათეულში შედის. 2011 წლის ათი თვის მონაცემებით ვაჭრობამ ორ ქვეყანას შორის 279 მილიონი დოლარი შეადგინა, რაც ერთი წლის წინანდელთან შედარებით 86 პროცენტით მეტია. საქართველოს ბულგარეთში ძირითადად გააქვს სპილენძის მადნები და კონცენტრატები, ქიმიური სასუქები და თხილი, თავის მხრივ, ბულგარეთი საქართველოს ბაზარს, სხვა პროდუქტებთან ერტად, აწვდის ნავთობპროდუქტებსა და სამკურნალო საშუალებებს.
ბულგარეთის სამთავრობო წრეებთან ვერა ქობალიას შეხვედრებისას ცალსახად ითქვა, რომ სავაჭრო-ეკონომიკური პოტენციალი ორ ქვეყანას შორის გაცილებით დიდია და არსებული დინამიკა შესაძლებლობებს სრულად ვერ ასახავს. ერთ-ერთი ასეთი მიმართულება, სადაც შესაძლებელია არა მხოლოდ ვაჭრობა, არამედ ერთობლივი საწარმოების ჩამოყალიბებაც ეთერზეთების წარმოება და ამისთვის აუცილებელი სასოფლო-სამეურნეო კულტურების მოყვანაა. ბულგარეთი ევროპისათვის ვარდისა და ლავანდის ზეთის ერთ-ერთი უმთავრესი მიმწოდებელია და მისი ეკონომიკისათვის ყოველწლიურად ასობით მილიონი დოლარის შემოსავალი მოაქვს. საქართველოს ნიადაგი და კლიმატური პირობები კი ეთერზეთოვანი კულტურების გაშენებისათვის იდეალურია.
კიდევ ერთი სტრატეგიული მიმართულება არის ტურიზმი. თუმცა ტურისტების რაოდენობის ზრდას ხელს უშლის ქვეყნებს შორის პირდაპირი ავიამიმოსვლის არარსებობა. ბულგარეთის ტრანსპორტის უწყების წარმომადგენლებთან შეხვედრისას, ასევე გამახვილდა ყურადღება საქართველოსა და ბულგარეთს შორის საკრუიზო მიმოსვლის აღდგენის შესაძლებლობებზეც.
