2012 წლის მაისში ბათუმს ახალი, თანამედროვე სტანდარტების ავტოსადგური ექნება. პროექტს თურქულ-ქართული კომპანია "ავრასია ჯორჯია" ახორციელბს. ავტოსადგური 400 ავტობუსს მოემსახურება და განკუთვნილი იქნება ტრანსპორტისთვის, რომლებიც როგორც საერთაშორისო, ისე საქალაქთაშორისო მარშრუტებზე იმუშავებენ.
ახალი სადგურის მშენებლონას დღეს აჭარის მთავრობის თავმჯდომარე ქალაქის მერთან და ფინანსთა და ეკონომიკის მინისტრთან ერთად გაეცნო.
შეგახსენებთ. რომ "ავრასია ჯორჯიასა" და აჭარის მთავრობას შორის ხელშეკრულება 2010 წლის დეკემბერში გაფორმდა და კომპანიამ ბათუმში, გოგოლის ქ #1-ში მდებარე 8202,4 კვმ შენობა-ნაგებობა და მასზე დამაგრებული 109098 კვმ მიწის ნაკვეთი მლნ. ლარად შეიძინა.
სახელმწიფოსა და ინვესტორს შორის გაფორმებული ხელშეკრულების თანახმად, "ავრასია ჯორჯია" ვალდებულია ხელშეკრულების ხელმოწერიდან 14 თვის ვადაში უზრუნველყოს უძრავი ქონების ტერიტორიაზე საქალაქთაშორისო ავტოსადგურისა და მასთან დაკავშირებული ღია ავტო-პარკის მშენებლობა და ექსპლუატაციაში შეყვანა. იმავდროულად, 24 თვის ვადაში უზრუნველყოს ღია ბაზარის მშენებლობა, ხოლო ხელშეკრულების ხელმოწერიდან 36 თვის ვადაში უძრავი ქონების ტერიტორიაზე უზრუნველყოს შოურუმებისა და სავაჭრო ცენტრის და მათთან დაკავშირებული ღია ავტოპარკის მშენებლობა და ექსპლუატაციაში შეყვანა.
