საქართველოს სავაჭრო-სამრეწველო პალატის პრეზიდენტი კიდევ ერთ საქმიან შეხვედრას დღეს, 2 დეკემბერს, უკრაინის დედაქალაქში მართავს. კიევში კახა ბაინდურაშვილი უკრაინის სავაჭრო-სამრეწველო პალატის პრეზიდენტს სერგეი სკრიპჩეკოს, პირველ ვიცე-პრეზიდენტს, პალატის პრეზიდიუმის გენერალურ მდივანს ვიქტორ იანკოვსკის და უკრაინის ბიზნესსექტორის წარმომადგენლებს ხვდება.
საქართველოს საინვესტიციო გარემო, კაპიტალის დაბანდებისათვის საინტერესო ტურისტული, ბიზნეს, ურბანული და სხვა პროექტები, ბიზნესგარემოს გაუმჯობესებისთვის გატარებული სტრუქტურული და საკანონმდებლო რეფორმები - ეს ის თემებია, რომელზედაც კახა ბაინდურაშვილი უკრაინელ კოლეგებთან ისაუბრებს.
როგორც ცნობილია, საქართველოს სავაჭრო-სამრეწველო პალატის პრეზიდენტმა უკრაინაში ერთკვირიანი ვიზიტის ფარგლებში გამართა ორმხრივი შეხვედრები ქალაქებში დნეპროპეტროვსკსა და დონეცკში. მონაწილეობა მიიღო უკრაინა-საქართველოს ბიზნესფორუმებში, რომლებიც ორივე ქალაქში გაიმართა.
ვიზიტის ფარგლებში გაფორმდა ურთიერთთანამშრომლობის შესახებ მემორანდუმი ორი ქვეყნის სავაჭრო-სამრეწველო პალატებს შორის.