"აჭარული ღვინის სახლმა"პირველი პროდუქციის ჩამოსხმა დაიწყო. პროცესს დღეს აჭარის მთავრობის თავმჯდომარეც აკვირდებოდა.
ლევან ვარშალომიძემ მარანში ღვინო დააგემოვნა და აღნიშნა, რომ ამ საწარმოს გახსნა 7 წლის წინათ დაწყებული საქმის ნაწილია.
"მაშინ ქედასა და შუახევში ვაზის ნერგები დავარიგეთ. ახლა აჭარას გააჩნია იმ რაოდენობის ყურძენი, რომ ინვესტორმა ღვინის ადგილზე წარმოება შეძლოს. "აჭარული ღვინის სახლი" პროდუქციას ქართული და ევროპული ტექნოლოგიებით უშვებს, რაც ადგილობრივებისა და ტურისტებისათვის ერთნაირად მიმზიდველი იქნება."- აღნიშნა ვარშალომიძემ.
მიმდინარე რთველზე ქარხანამ 14 ტონა ცოლიკაური (კილოგრამი 1,3-1,5 ლარად) და 8 ტონა ჩხავერი (კილოგრამი 3-დან 4 ლარად) მიიღო. "აჭარული ღვინის სახლი" კიდევ 1 ტონა ცოლიკაურსა და 2 ტონა ჩხავერს ჩაიბარებს. ქარხანა წელიწადში 100 000 ბოთლამდე ღვინოს ჩამოსხმას გეგმავს.
საწარმო, რომელიც უმაღლესი ხარისხის ღვინოებს გამოუშვებს, ძირითადად ღვინის ტურების მოყვარულებზეა გათვლილი. იქ ღვინის ქარხნის გარდა, ტურისტებისთვის საპრეზენტაციოდ არის: ჩხავერის ჯიშის ვენახი, ღვინის სადეგუსტაციო დარბაზები, მარანი და რესტორანი.
