სასესხო ხელშეკრულებას ხელი მოაწერეს საქართველოს ფინანსთა მინისტრმა დიმიტრი გვინდაძემ და აზიის განვითარების ბანკის (ADB) მუდმივმა წარმომადგენელმა საქართველოში ქეითი მ. ჯულიანიმ(Kathie M. Julian).

აღნიშნული ტრანშის ფარგლებში გათვალისწინებულია დაახლოებით 40 მლნ აშშ დოლარის გამოყოფა, შეღავათიანი ფინანსური პირობებით (სესხის ხანგრძლივობა 32 წელი, მათ შორის 8 წელი შეღავათიანი პერიოდი; საპროცენტო განაკვეთი შეადგენს წლიურ 1%-ს შეღავათიანი პერიოდის განმავლობაში და 1.5%-ს - შეღავათიანი პერიოდის გასვლის შემდეგ), რომელიც მოხმარდება ანაკლიასა და მესტიაში წყალმომარაგებისა და კანალიზაციის სისტემის სრულყოფას, რეკონსტრუქციასა და რეაბილიტაციას. მეორე ტრანშის ფარგლებში, მესტიაში დაგეგმილია წყალმომარაგებისა და კანალიზაციის შიდაგამანაწილებელი ქსელების მშენებლობა-რეაბილიტაცია, რომლის შედეგადაც მესტიის მოსახლეობა უზრუნველყოფილი იქნება 24-საათიანი წყალმომარაგებით. 2011 წლის დეკემბერში ანაკლიაში დაგეგმილია წყალმომარაგებისა და კანალიზაციის შიდა გამანაწილებელი ქსელების მშენებლობა-რეაბილიტაციის პროექტის დაწყება, ხოლო 2012 წლის პირველ ნახევარში დაიწყება ანაკლიის კანალიზაციის გამწმენდი ნაგებობის მშენებლობა.

პროექტის საბოლოო მიზანია, საქართველოს ტურისტულ ცენტრებსა და მსხვილ ურბანულ დასახლებებში უწყვეტი და საიმედო წყალმომარაგების უზრუნველყოფა, აგრეთვე გარემოზე უარყოფითი ზეგავლენის შემცირება და სანიტარული პირობების გაუმჯობესება.

აღსანიშნავია, რომ აღნიშნული პროგრამის ფარგლებში 2011 წლის 10 მაისს გაფორმდა პირველი ტრანში საერთო თანხაზე, რომელიც შეადგენს დაახლოებით 80 მლნ. აშშ დოლარს. ამ ტრანშიდან ფინანსდება მესტიაში წყლის სათავე ნაგებობისა და მაგისტრალური ხაზის, ასევე წყლის გამწმენდი ნაგებობისა და რეზერვუარის მშენებლობა; ანაკლიისა და ზუგდიდის სათავე ნაგებობებისა და მაგისტრალური ხაზების მშენებლობა.

ამჟამად პირველი ტრანშის ფარგლებში დაწყებულია მესტიაში წყალმომარაგების სათავე ნაგებობის მშენებლობა-რეაბილიტაცია. 2012 წლის მე-2 კვარტლიდან დაგეგმილია წყლის გამწმენდი ნაგებობის მშენებლობის დაწყება.