თბილისში ხუალინის სპეციალური ეკონომიკური ზონა აშენდება. ხელი მოეწერა მემორანდუმს საქართველოს ეკონომიკისა და მდგრადი განვითარების სამინისტროსა და "სინძიანის ხუალინის სავაჭრო-სამრეწველო ჯგუფს" შორის თბილისში "ხუალინის საერთაშორისო სპეციალური ეკონომიკური ზონის" შექმნის შესახებ.
ხელმოწერის ცერემონია საქართველოს პარლამენტის შენობაში შედგა, საქართველოს მხრიდან მემორანდუმს ხელი მოაწერა ეკონომიკისა და მდგრადი განვითარების მინისტრმა ვერა ქობალიამ.
მემორანდუმის თანახმად, "სინძიანის ხუალინის სავაჭრო-სამრეწველო ჯგუფი" ვალდებულებას იღებს, რომ თბილისში, "ხუალინის სპეციალურ ეკონომიკურ ზონაში" ააშენებს 2015 წელს თბილისში დაგეგმილი ზაფხულის ახალგაზრდული ოლიმპიური ჩემპიონატის ჩასატარებლად მოწყობილ დამხმარე საცხოვრებელ სასტუმროს, რომლის საერთო ფართი არ უნდა აღემატებოდეს 65 000 კვმ-ს. ასევე მოიცავს ბაზრის ტერიტორიას, საწარმოო და სასაწყობე ფართს, საცხოვრებელ კომპლექსს, სარეკრეაციო და დასასვენებელ ზონას და ა.შ. ჩინური მხარის ინვესტიცია უნდა შეადგენდეს არანაკლებ 150 მილიონ აშშ დოლარს.
თავის მხრივ, ქართული მხარე წამოწყებული ინვესტირების განხორციელებისა და პროექტის მშენებლობის უზრუნველსაყოფად ჩინელ ინვესტორებს უშუამდგომლებს საქართველოს პრეზიდენტის წინაშე არანაკლებ 420 ჰექტარი მიწის ფართის შეღავათიან ფასებში მიყიდვაზე.
ეკონომიკისა და მდგრადი განვითარების მინისტრმა კომენტარი გააკეთა აღნიშნულ პროექტთან დაკავშირებით, სადაც აღნიშნა, რომ ინვესტიციის შედეგად, როგორც უშუალოდ მშენებლობის, ისე სპეციალური ზონის ამოქმედების შემდეგ დასაქმდება ასობით ჩვენი მოქალაქე.
"ვფიქრობ, მსგავსი წარმატებული პროექტები იქნება სტიმული სხვა პოტენციური ინვესტორებისთვის, რათა შემოვიდნენ საქართველოს ბაზარზე, დაიწყონ ბიზნესი და შექმნან ახალი სამუშაო ადგილები" - განაცხადა ვერა ქობალიამ.
