"იმ პირობებშიც კი, რა პირობებშიც იქ ეს ე.წ. არჩევნები ტარდება - ტოტალური გაყალბების, ტოტალური უკონტროლობის, ტოტალური ძალადობის პირობებშიც კი - რუსეთის მიერ ხელდასხმულ კანდიდატს აქვს სერიოზული პრობლემა. ეს თავისთავად ძალიან საინტერესო მანიშნებელია. გავიხსენოთ, ცოტა ხნის წინ მიმდინარე პროცესი, როდესაც რუსეთმა ისე დაასრულა მოლაპარაკებები საქართველოსთან ვაჭრობის მსოფლიო ორგანიზაციაზე, რომ ერთხელაც არ გახსენებია, მისი ე.წ. შვილობილი სახელმწიფოები და ერთხელაც არ უკითხავს აზრი აფხაზებისთვის და ოსებისთვის", _ აცხადებს ბაქრაძე.

მისი თქმით, მეორე მხრივ, დღეს ცხინვალში მიმდინარე პროცესებში რუსეთის პრეზიდენტის მიერ მხარდაჭერილი კანდიდატი აღმოჩნდა პრატიკულად წაგებულ მდგომარეობაში.

"ორივე ფაქტი ძალიან ნათლად აჩვენებს, რომ რუსეთს და ოკუპირებულ ტერიტორიაზე დღეს მცხოვრებ ადამიანებს ძალიან ცოტა აქვთ საერთო ინტერესი და მიუხედავად იმისა, რომ დღეს ორივე რეგიონი ოკუპაციის ქვეშ არის და მიუხედავად იმისა, რომ ორივე რეგიონი განიცდის ძალიან ძლიერ პროპაგანდისტულ ზეგავლენას, რომ სწორედ რუსეთია მათი დამცველი და მფარველი, მიუხედავად ყოველივე ამისა, ძალიან კარგად ჩანს, რომ როდესაც საქმე საქმეზე მიდგება, რუსეთისა და დღეს იქ მცხოვრები ადამიანების ინტერესები დიამეტრალურად განსხვავდება ერთმანეთისგან", _ აცხადებს საქართველოს პარლამენტის თავმჯდომარე და აღნიშნავს, რომ მისი აზრით, ეს ძალიან მნიშვნელოვანი სიგნალი უნდა იყოს როგორც იქ მცხოვრები ადამიანებისთვის, ასევე იმ ადამიანებისთვის, ვინც რუსეთში ცდილობს გააგრძელოს და გაამართლოს ოკუპაციის პოლიტიკა.