უცენზურო და შეურაცხმყოფელი ხასიათის სიტყვების სახელად არჩევა დაუშვებელია. ამას "სამოქალაქო აქტების შესახებ" კანონპროექტი ითვალისწინებს, რომელიც პარლამენტში უკვე ინიცირებულია.
ახალი ცვლილებებით, სახელის შეცვლა დაუშვებელია, თუ განმცხადებელი სახელად ირჩევს ციფრებს, სასვენ ნიშნებს, გეომეტრიულ ფიგურებს, გრაფიკულ გამოსახულებებს, სიმბოლოებს, უცენზურო და შეურაცხმყოფელი ხასიათის სიტყვებს ან მრავალწევრიან (ორზე მეტი სახელისაგან შემდგარ) სახელს.
ასევე მეუღლეთა ან მშობლების გვარების შეერთება დაუშვებელია, თუ ერთ-ერთ მათგანს მაინც აქვს ორწევრიანი (ორმაგი) გვარი.
სახელის და გვარის შეცვლა, გვარის ნამდვილად ცნობა, ასევე გვარის დადგენა დაუშვებელია, თუ პირი ეჭვმიტანილია დანაშაულის ჩადენაში და იძებნება საქართველოს სამართალდამცავი ორგანოების მიერ.
