27 ნოემბრამდე ტურიზმის ეროვნული სააგენტოს ინიციატივით იმართება პრეს და გაცნობითი ტური 45 ლატვიელი, უკრაინელი, რუსი, აზერბაიჯანელი და ყაზახი ტურ-ოპერატორისა და ჟურნალისტისათვის. ტურის ფარგლებში ისინი ეწვევიან თბილისის ისტორიულ ნაწილს, მცხეთას, უფლისციხეს, თუმცა ძირითადი აქცენტი გაკეთდება ზამთრის კურორტებზე - ბაკურიანსა და გუდაურზე.

25 ნოემბერს 17:30 საათზე, სასტუმრო "Holiday Inn"-ში გაიმართება შეხვედრა, სადაც ტურიზმის ეროვნული სააგენტოს თავმჯდომარე მაია სიდამონიძე ჩამოსულ სტუმრებს საქართველოს ზამთრის ტურისტულ პოტენციალს გააცნობს, ინფო-ტურის ფარგლებში ჩამოსულ ტუროპერატორებსა და ჟურნალისტებს შესაძლებლობა ექნებათ შეხვდნენ ქართველ კოლეგებს, მოისმინონ პრეზენტაციები და გამართონ საქმიანი მოლაპარაკებები.

ტურის მიზანს წარმოადგენს საქართველოს ტურისტული პოტენციალის და განსაკუთრებით სამთო-სათხილამურო კურორტების - ბაკურიანისა და გუდაურის პოპულარიზაცია. ზემო აღნიშნული ქვეყნების ბაზარზე საკმაოდ დიდი დაინტერესება შეიმჩნევა საქართველოს ზამთრის კურორტების მიმართ. ტურ-ოპერატორებისა და ჟურნალისტებისათვის გაცნობითი ტურის მოწყობა კიდევ უფრო შეუწყობს ხელს აღნიშნული ქვეყნის მოქალაქეებში ამ კურორტების შესახებ ინფორმაციის მიწოდებას და ტურისტთა ნაკადების ზრდას. ვიზიტის ფარგლებში დაგეგმილია ქართველ ტურ-ოპერატორებთან შეხვედრა, ჟურნალისტების მიერ მომზადდება ბეჭდვითი სტატიები და სატელევიზიო სიუჟეტები.