ფრაქცია "ერთობა სამართლიანობისთვის" 2011 წლის სახელმწიფო ბიუჯეტში შესატანი ცვლილებათა პროექტს მხარს არ უჭერს. ცაგარეიშვილმა აქცენტი "საბიუჯეტო კორუფციაზე" და ბიუჯეტის გაუმჭირვალობაზე გააკეთა და აღნიშნა, რომ წლის ბოლოს თავდაცვის სამინისტროს 45 მილიონი, შსს-ს 30 მილიონზე მეტი, ეკონომიკისა და მდგრადი განვითარების სამინისტროს 40 მილიონზე მეტი ემატება, ხარჯები დეტალურად გაწერილი არ არის და არავინ იცის სად და როგორ უნდა დაიხარჯოს ეს თანხები.
ფრაქციის თავმჯდომარე გიორგი ცაგარეიშვილის განცხადებით, გაუგებარია, რატომ იზრდება პენსია 2012 წლის 1 სექტემბრიდან და რატომ არ შეიძლება პენსიონერებმა თუნდაც 5 ლარით გაზრდილი პენსია 1 იანვრიდან მიიღონ, იმ ფონზე როცა ცენტრალურ ბიუჯეტში დამატებით 219 მილიონი ლარის ოდენობის შემოსავალი გაჩნდა.
"როცა უმრავლესობა ბიუჯეტის თემაზე სემინარებისა და ლექციების ჩატარების სურვილს გამოხატავს, უნდა იცოდეს, რომ ხალხს სემინარები ვერ დაანაყრებს და პურზე ლექციას ვერ წაუსვამს. მაგალითად, როცა წარმოდგენილ საბიუჯეტო ცვლილებებში გუდაურში საბაგირო ხაზის მშენებლობისთვის 19 მილიონი ლარი და სხვა ათასგვარი გაუმართლებელი ხარჯია ჩადებული, ხოლო კონკრეტული სოციალური ჯგუფები კვლავ უმძიმეს მდგომარეობაში რჩებიან, ჩვენ თურმე დაფინანსებისა და ეკონომიკის ბაზა უნდა შევისწავლოთ" - აცხადებს ცაგარეიშვილი.
