მცხეთა-მთიანეთის საინფორმაციო ცეტრი წერს, რო ლუდის ახალი ქარხანა სს „ქართული ლუდის კომპანიას" ეკუთვნის.რომელიც მცხეთა - მთიანეთის გუბერნატორის ცეზარ ჩოჩელის ძმამ იაგო ჩოჩელმა სამ პარტნიორთან ერთად კომპანია 2011 წლის 9 ივნისს დააფუძნა.

ლუდის ახალი საწარმო ალკოჰოლური სასმელების გარდა სუსტალკოჰოლური და უალკოჰოლო სასმელების, მათ შორის ხილის წვენების წარმოებასაც გეგმავს. ქარხნის სიმძლავრე წელიწადში 400 000 ჰექტოლიტრი ლუდისა და 300 000 ჰექტოლიტრი ლიმონათის წარმოებაზეა გათვლილი. საწარმოს ხელმძღვანელობა პროდუქციის ექსპორტზე გატანასაც აპირებს. ქარხანა ჩეხურმა კომპანიამ „ძVU POთEძ"-მა დააპროექტა. მშენებლობას ქართული კომპანიები ახორციელებენ. ლუდის ახალი ქარხნის მშენებლობა 2012 წლის მარტში დასრულდება. სამეწარმეო რეესტრში არსებული ჩანაწერების თანახმად, საწარმოს დირექტორი მინდია გუმბარიძეა.

ლუდის წარმოება ჩოჩელებისთვის კარგად აპრობირებული საქმეა. აგვისტოს ომამდე ახალგორში ლუდის ქარხანა ფუნქციონირებდა, სადაც ქართული ლუდი „ლომისი" ისხმებოდა. „ლომისის" საწარმო მცხეთა - მთიანეთის ამჟამინდელი გუბერნატორის, ცეზარ ჩოჩელის მიერ იყო დაარსებული. „ლომისის" ლუდის ქარხანა მუშაობას მას შემდეგაც აგრძელებდა, რაც ახალგორი რუსული მხარის მიერ ოკუპირებულ ტერიტორიაზე მოექცა. ოსური მედიის ინფორმაციით, „ლომისის" ყოფილ ქარხანაში სამი სახეობის ლუდი - „ალუტონ", „ჟიგულევსკოე" და „კარლოვ მოსტ" ჩამოასხეს. თუმცა, ამჟამად ეს საწარმო დალუქულია.

ცენტრისვე ინფორმაციით, ლუდის ქარხანა „ნატახტარი" კი იაგო ჩოჩელს ეკუთვნოდა. „ნატახტარი" მან რამდენიმე წლის წინ Efes Beer International-ს მიჰყიდა. Efes-თან დადებული კონტრაქტის საფუძველზე, ჩოჩელს გარკვეული პერიოდის განმავლობაში ლუდის ბიზნესში შესვლის უფლება არ ჰქონდა. Efes Beer International-თან დადებული კონტრაქტის ვადის გასვლის შემდეგ, იაგო ჩოჩელმა 3 პარტნიორთან ერთად სს „ქართული ლუდის კომპანია" დააფუძნა.

მცხეთა-მთიანეთის საინფორმაციო ცენტრში აცხადებენ, რომ გუბერნატორ ცეზარ ჩოჩელის თითქმის მთელი ქონების განმკარგავი მისი ძმა იაგო ჩოჩელია. ცეზარ ჩოჩელს 2011 წელს შევსებულ ქონებრივ დეკლარაციაში მითითებული აქვს, რომ მისი მოძრავი და უძრავი ქონების მართვისა და განკარგვის უფლება მინდობილობით საკუთარ ძმას მისცა. ზეპირი შეთანხმების საფუძველზე, იაგო ჩოჩელს გადაეცა განსაკარგავად 6 მილიონ 400 ათასი დოლარის ოდენობის თანხაც.